پی سی بی کا 17 سال سے انٹرنیشنل کرکٹ سے محروم سٹیڈیم کی اپ گریڈیشن کا فیصلہ

وزیر اعلیٰ سندھ کی محسن نقوی سے ملاقات ، سندھ میں کرکٹ کے فروغ، میچز کے انعقاد اور سٹیڈیمز کی تعمیر نو کے امور پر تفصیلی گفتگو

ذیشان مہتاب جمعرات 5 جون 2025 14:45

پی سی بی کا 17 سال سے انٹرنیشنل کرکٹ سے محروم سٹیڈیم کی اپ گریڈیشن کا ..

اسلام آباد (اردو پوائنٹ تازہ ترین اخبار ۔ 5 جون 2025ء ) وزیر اعلیٰ سندھ مراد علی شاہ نے وفاقی وزیر داخلہ و چیئرمین پی سی بی محسن نقوی سے ملاقات کی جس میں سندھ میں کرکٹ کے فروغ، میچز کے انعقاد اور سٹیڈیمز کی تعمیر نو کے امور پر تفصیلی گفتگو ہوئی۔

چیئرمین پی سی بی محسن نقوی اور وزیراعلیٰ سندھ مراد علی شاہ میں سندھ میں کرکٹ کے فروغ اور سٹیڈیمز کی بحالی پر مشاورت کی گئی۔

ملاقات میں نیاز سٹیڈیم حیدرآباد کی عالمی معیار کے مطابق اپ گریڈیشن کا فیصلہ کیا گیا۔

چیئرمین پی سی بی محسن نقوی نے کہا کہ اپ گریڈیشن کے بعد نیاز سٹیڈیم میں17 برس بعد انٹرنیشنل میچ کا انعقاد ہو سکے گا، رواں برس ہی نیاز سٹیڈیم حیدرآباد میں انٹرنیشنل میچ کے انعقاد کی کوشش کریں گے، پی سی بی کی ٹیم آئندہ ہفتے نیاز سٹیڈیم حیدرآباد کا دورہ کرے گی اور تمام تر سہولتوں کا جائزہ لے گی۔

(جاری ہے)

وزیر اعلیٰ سندھ مراد علی شاہ نے کہا کہ صدر آصف زرداری کی ہدایت پرسندھ حکومت کے تعاون سے نیاز سٹیڈیم کی انٹرنیشنل لیول کی اپ گریڈیشن ہو گی، نیاز سٹیڈیم میں سہولتوں کو مل کر بہتر بنائیں گے۔

چیئرمین پی سی بی محسن نقوی نے کہا کہ کرکٹ کے نئے وینیوز پر کام کر رہے ہیں، حیدر آباد اور فیصل آباد میں بین الاقوامی کرکٹ کی بحالی پہلی ترجیح ہے۔

یاد رہے کہ نیاز سٹیڈیم حیدرآباد میں آخری بین الاقوامی ون ڈے میچ 2008ء میں پاکستان اور زمبابوے کے درمیان کھیلا گیا تھا۔

سندھ کے صوبائی وزیر جام خان شورو اور چیف آپریٹنگ آفیسر پی سی بی سمیر احمد بھی اس موقع پر موجود تھے۔