Live Updates

وزیراعلیٰ خیبرپختونخوا علی امین خان گنڈاپور کا پشاور میں منعقدہ جرگے سے خطاب

منگل 3 جون 2025 21:40

پشاور (اُردو پوائنٹ اخبارتازہ ترین - اے پی پی۔ 03 جون2025ء) وزیر اعلیٰ خیبر پختونخوا علی امین خان گنڈاپور نے کہا ہے کہ بزدل دشمن کی جارحیت کا منہ توڑ جواب دینے پر پوری قوم کو مبارکباد پیش کرتا ہوں۔ ملکی دفاع اور سا لمیت کے لیے ہم ایک ہیں اور ہم نے سیاسی اختلافات کو بالائے طاق رکھ کر اتحاد کا ثبوت دیاہے۔ وزیراعلیٰ نے منگل کو پشاور میں منعقدہ جرگے سے خطاب کرتے ہوئے کہا کہ وفاقی حکومت سابق فاٹا اور پاٹا پر ٹیکس لگانے سے گریز کرے، ان علاقوں کے عوام کی مالی صورتحال ٹیکس دینے کے قابل نہیں ۔

اُنہوں نے کہاکہ ضم اضلاع دہشت گردی کے خلاف جنگ میں بری طرح متاثر ہوئے ہیں، ان علاقوں میں خطیر سرمایہ کاری کی ضرورت ہے،ضم اضلاع کے لوگوں نے ملک کی خاطر بے شمار قربانیاں دی ہیں ، انکے ساتھ کیے گئے وعدے پورے کیے جائیں۔

(جاری ہے)

وزیر اعلیٰ نے مطالبہ کیا ہے کہ وفاقی حکومت ضم اضلاع کے بے گھر افراد کے معاوضوں کے پیسے جلد جاری کرے۔ انھوں نے یہ بھی مطالبہ کیا ہے کہ این ایف سی میں ضم اضلاع کا حصہ صوبے کو منتقل کرنے کا فوری اعلان کیا جائے، ہم کسی دوسرے صوبے کا حق نہیں مانگ رہے بلکہ ہمیں اپنا حق دیا جائے۔

وزیر اعلیٰ نے مزید مطالبہ کیا ہے کہ وفاقی حکومت اپنے ذمے خیبرپختونخوا کے تمام بقایاجات اورصوبے کے پن بجلی کے خالص منافع کے بقایاجات بھی ادا کرے ۔ٹوبیکو سیس کاپورا حصہ دیا جائے ۔ وزیر اعلیٰ نے کہا کہ ضم اضلاع میں تنازعات کے پائیدار حل کے لیے جرگہ سسٹم بحال کیا جائے۔پڑوسی ملک افغانستان کے ساتھ مذاکرات کے عمل میں خیبر پختونخوا کو بھی شامل کیا جائے۔