مقبوضہ کشمیر میں بھارتی فوج نے جنوری 1989سے اب تک 930کشمیری بچوں کو شہید کیا ہے، کشمیر میڈیا سروس

سرینگر (اُردو پوائنٹ اخبارتازہ ترین - اے پی پی۔ 04 جون2025ء) غیرقانونی طورپر بھارت کے زیر قبضہ جموں وکشمیرمیں بھارتی فوجیوں نے بے گناہ کشمیریوں کے خلاف اپنی ریاستی دہشت گردی کی جاری کارروائیوں کے دوران جنوری 1989سے اب تک 930کشمیری بچوں کو شہید کیا ہے۔کشمیر میڈیا سروس کے شعبہ تحقیق کی طرف سے ”جارحیت کا شکار معصوم بچوں کے عالمی دن “کے موقع پر جاری کی گئی ایک رپورٹ کے مطابق گزشتہ 37 سالوں میں بھارتی فورسز نے 96ہزار4سو49کشمیریوں کو شہید کیا جن میں 930بچے شامل ہیں۔

اس دوران 1لاکھ 7ہزار 9سو 82بچے یتیم ہوئے۔ رپورٹ میں کہا گیا ہے کہ 2010سے اب تک بھارتی فورسز کی گولیوں، پیلٹ چھروں اور آنسو گیس کے گولوں سے ہزاروں بچے زخمی ہوئے ہیں جن میں سے سینکڑوں بینائی سے محروم ہو چکے ہیں۔

(جاری ہے)

رپورٹ میں فوجی قبضے میں پروان چڑھنے والے کشمیری بچوں پرپڑنے والے شدید نفسیاتی اثرات اور جسمانی نقصانات کو اجاگر کیاگیا ہے۔

متعدد کمسن بچوں کو جعلی مقابلوں میں یا دوران حراست شہید کیا گیا ہے جبکہ کئی کالے قوانین کے تحت غیر قانونی طور پر نظر بند ہیں۔دریں اثنا ءکل جماعتی حریت کانفرنس کے ترجمان ایڈوکیٹ عبدالرشید منہاس نے اقوام متحدہ، اسلامی تعاون تنظیم، یورپی یونین اور بچوں کے حقوق کے اداروں سے مطالبہ کیاہے کہ وہ کشمیری بچوں کو بھارتی جارحیت سے بچانے کے لیے فوری اقدامات کریں۔

انہوں نے بچوں کو جنگی ہتھیار کے طور پر استعمال کرنے پر بھارت کی مذمت کی۔کل جماعتی حریت کانفرنس کے سینئر رہنما میر واعظ عمر فاروق نے سرینگر میں جاری ایک بیان میں کشمیری ملازمین کی جبری برطرفی کی مذمت کرتے ہوئے اسے ظالمانہ قرار دیا۔ انہوں نے کہاکہ فلسطین سے کشمیر تک صرف انصاف اور باہمی احترام سے ہی دیر پا اور پائیدار امن قائم کیا جاسکتا ہے۔

بھارتی پولیس نے ریاستی جبر کی ایک اور کارروائی میں ضلع رامبن کے علاقے دھرم کنڈ میں ایک شہری علی محمد کی 1کنال 11مرلہ زرعی اراضی کالے قانون ”یو اے پی اے“ کے تحت ضبط کرلی۔نئی دہلی میں حزب اختلاف کی 16جماعتوں نے بھارتی وزیر اعظم نریندر مودی کے نام خط لکھا ہے جس میں پہلگام کے فالس فلیگ آپریشن کے بعد پیش آنے والے واقعات پربحث کے لئے پارلیمنٹ کا خصوصی اجلاس بلانے کا مطالبہ کیا گیا ہے۔ انہوں نے بھارتی پارلیمنٹ کو نظر انداز کرکے غیر ملکیوں کو بریفنگ دینے پر مودی حکومت کو تنقید کا نشانہ بنایا۔ خط میں جنگ بندی کے طریقہ کار اور پہلگام واقعے کے بعد بھارت کی سفارتی ناکامی پر تشویش کا اظہار کیا گیا ہے۔