وزیراعظم محمد شہباز شریف اور فیلڈ مارشل سید عاصم منیر کی قیادت میں پاکستان ہر اندرونی و بیرونی چیلنج کا مقابلہ کرنے کی پوری صلاحیت رکھتا ہے،انجینئر امیر مقام

پشاور (اُردو پوائنٹ اخبارتازہ ترین - اے پی پی۔ 06 جون2025ء) وفاقی وزیر امور کشمیر، گلگت بلتستان و سیفران اور پاکستان مسلم لیگ (ن) خیبر پختونخوا کے صدر انجینئر امیر مقام نے جمعہ کو الپوری، شانگلہ کے ڈسٹرکٹ ہیڈ کوارٹر ہسپتال میں سولرائزیشن منصوبے کا افتتاح کیا۔افتتاح کے بعد الپوری کے جرگہ ہال میں ایک بڑے عوامی اجتماع سے خطاب کرتے ہوئے وفاقی وزیر نے کہا کہ آپریشن راہ حق کی کامیابی افواج پاکستان، فیلڈ مارشل سید عاصم منیر اور پوری قوم کے لیے شکر گزاری کا لمحہ ہے۔

انہوں نے کہا کہ یہ تاریخی کامیابی پاکستان کو ایک نئی عالمی شناخت دے رہی ہے اور اقوام عالم میں اس کے قد و قامت کو بڑھا رہی ہے۔وفاقی وزیر نے کہا کہ قوم کا اتحاد اسی طرح جاری رہا تو دنیا کی کوئی طاقت پاکستان کو شکست نہیں دے سکتی۔

(جاری ہے)

وزیراعظم محمد شہباز شریف اور فیلڈ مارشل سید عاصم منیر کی قیادت میں پاکستان ہر اندرونی و بیرونی چیلنج کا مقابلہ کرنے کی پوری صلاحیت رکھتا ہے۔

وفاقی وزیر نے مزید کہا کہ ایک مخصوص مذموم ایجنڈے کے تحت پاکستان کو بدنام کرنے کی کوشش کرنے والے بھی اب شرم محسوس کر رہے ہیں۔انہوں نے کہا کہ اس بار پی ٹی آئی کی احتجاجی کال ان کا اصل چہرہ سب کے سامنے بے نقاب کرے گی۔ قوم نے جھوٹ اور انتشار کی سیاست کو یکسر مسترد کر دیا ہے اور خیبرپختونخوا کے نوجوانوں نے تحریک انصاف کی ایجی ٹیشن سیاست سے دوری شروع کر دی ہے۔

انجینئر امیر مقام نے کہا کہ پی ٹی آئی 12 سالہ حکومت کے باوجود خیبرپختونخوا میں عوامی مسائل حل کرنے میں ناکام رہی۔امیر مقام نے اپنے پختہ عزم کا اعادہ کیا کہ چاہے زلزلہ ہو، سیلاب ہو یا دہشت گردی وہ ہمیشہ مشکل کی گھڑی میں عوام کے ساتھ کھڑے رہے ہیں، کھڑے ہیں اور ہمیشہ ان کے شانہ بشانہ رہیں گے۔انہوں نے کہا کہ مسلم لیگ ن حکومت نے موٹر ویز کا جال بچھا دیا، دہشت گردی کا خاتمہ کیا اور لوڈشیڈنگ کا خاتمہ کیا۔

انجینئر امیر مقام نے کہا کہ وزیر اعظم محمد شہباز شریف کی حکومت نے پی ٹی آئی کی 4 سال کی ناقص حکومت کے بعد ملک کو معاشی بدحالی اور دیوالیہ ہونے سے بچایا ہے۔انہوں نے کہا کہ کوہستان سکینڈل سے خیبرپختونخوا میں کرپشن کے کیسز دوبارہ سامنے آئے۔ تقریب میں چھٹی ہونے کے باوجود لوگوں کی بڑی تعداد نے شرکت کی۔یو این ایچ سی آر، افغان کمشنریٹ، وزارت سیفران اور دیگر متعلقہ اداروں کے سینئر حکام نے بھی تقریب میں شرکت کی۔لوگوں نے شانگلہ ڈی ایچ کیو ہسپتال کی سولرائزیشن کا دیرینہ مطالبہ پورا کرنے پر انجینئر امیر مقام کا شکریہ ادا کیا۔انہوں نے وزیر اعظم محمد شہباز شریف، مسلم لیگ ن کے صدر محمد نواز شریف اور انجینئر امیر مقام کے حق میں بھرپور نعرے بھی لگائے۔