ملک میں گرمی کی شدت اور تسلسل کے پیش نظر موافقت ناگزیر ہو چکی ہے، وزارت موسمیاتی تبدیلی

جمعہ 6 جون 2025 21:49

اسلام آباد (اُردو پوائنٹ اخبارتازہ ترین - اے پی پی۔ 06 جون2025ء) وزارت موسمیاتی تبدیلی و ماحولیاتی ہم آہنگی کے ترجمان محمد سلیم شیخ نے کہا ہے کہ ملک میں بار بار اور شدید ہوتی گرمی کی لہروں سے نمٹنے کے لیے فوری اور ہم آہنگ اقدامات ناگزیر ہو چکے ہیں۔جمعہ کو وزارت کے ترجمان محمد سلیم شیخ نے ایک بیان میں کہا کہ رواں سال ملک کے کئی حصوں میں درجہ حرارت 50 ڈگری سینٹی گریڈ سے تجاوز کر چکا ہے اور مارچ سے ہی سندھ، بلوچستان اور جنوبی پنجاب کے مختلف علاقوں میں طویل اور شدید گرمی کی لہر جاری ہے، جو انسانی صحت، معیشت اور بنیادی ڈھانچے کے لیے سنگین خطرہ بن چکی ہے۔

انہوں نے کہا کہ اقوام متحدہ کی آئی پی سی سی رپورٹ پاکستان کو شدید گرمی کے خطرات سے دوچار ممالک میں شمار کرتی ہے، اور یہ خطرات آئندہ برسوں میں مزید بڑھیں گے۔

(جاری ہے)

وزارت نے صوبائی و ضلعی اداروں کو فوری اقدامات کی ہدایت کی ہے، جن میں گرمی کی وارننگز کا بروقت اجرا، شہری علاقوں میں کولنگ سینٹرز کا قیام، سبز جگہوں کا فروغ، صاف پانی کی فراہمی، طبی سہولیات میں اضافہ اور آگاہی مہمات شامل ہیں۔

وزارت کے ڈائریکٹر جنرل محمد آصف صاحبزادہ نے کہا کہ عوام کو چاہیے کہ وہ محکمہ موسمیات اور ڈیزاسٹر مینجمنٹ کی ہدایات پر عمل کریں، دھوپ میں غیر ضروری نکلنے سے گریز کریں اور بزرگوں، مزدوروں و بچوں کا خاص خیال رکھیں۔انہوں نے زور دیا کہ اب موافقت پالیسی نہیں بلکہ بقا کی حکمت عملی ہے۔ حکومت اور سول سوسائٹی کو مل کر فوری اقدام کرنا ہو گا۔