پنجاب میں پہلی مرتبہ عید الاضحیٰ پر سبزیوں اور مصالحہ جات کی قیمتیں نہیں بڑھنے دی گئیں

لاہور ( اردوپوائنٹ اخبار تازہ ترین۔ آئی پی اے ۔ 06 جون 2025ء ) وزیراطلاعات و ثقافت پنجاب عظمیٰ بخاری نے کہا ہے کہ پنجاب کی تاریخ میں پہلی مرتبہ عیدالاضحیٰ سے قبل سبز مصالحہ جات سستے داموں عوام کو میسر ہیں، جو وزیراعلیٰ مریم نواز کی عوام دوست پالیسیوں اور گڈگورننس کا عملی ثبوت ہے۔ انہوں نے کہا کہ وزیراعلیٰ پنجاب نے عید سے قبل اشیائے ضروریہ کی قیمتوں میں کسی قسم کا اضافہ نہ ہونے دیا اور نہ ہی کسی شے کی مارکیٹ میں کمی واقع ہونے دی۔

ان کا کہنا تھا کہ یہ پہلا موقع ہے کہ کسی وزیراعلیٰ نے خود قیمتوں پر کنٹرول کے لیے دن رات نگرانی کی اور مارکیٹ میکانزم کو فعال رکھا۔ عظمیٰ بخاری نے واضح کیا کہ پاکستان کی تاریخ میں کبھی کسی صوبے میں نہ تو اس اہم مسئلے پر کوئی سنجیدہ اجلاس ہوا اور نہ ہی کسی حکومت نے اتنی واضح حکمت عملی کے تحت عوام کو ریلیف فراہم کیا۔

(جاری ہے)

کیا کسی نے سنا کہ کسی اور صوبے میں سبز مصالحہ جات یا سبزیوں کی قیمتوں پر اجلاس منعقد ہوا ہو؟ وزیر اطلاعات نے کہا کہ وزیراعلیٰ مریم نواز کی قیادت میں آٹا، پیاز، ٹماٹر اور دیگر سبزیوں کی قیمتوں میں بھی واضح کمی لائی گئی ہے۔

مریم نواز صرف اقتدار میں آنے نہیں، بلکہ عوام کو حقیقی ریلیف دینے آئی ہیں۔ انہوں نے مزید کہا کہ  یہی ہے اصل گڈ گورننس اور عوامی حکومت، جس کی بنیاد عوام کی فلاح، ریلیف اور فوری عملی اقدامات پر ہے۔ عوامی شفافیت کے لیے عظمیٰ بخاری نے مارکیٹ میں آویزاں سبز مصالحہ جات کی سرکاری نرخ ناموں کی ویڈیوز بھی سوشل میڈیا پر جاری کی ہیں، تاکہ عوام خود دیکھ سکیں کہ حکومت نے قیمتوں کو کس طرح کنٹرول میں رکھا۔

دوسری جانب وزیر اعلی پنجاب مریم نواز شریف نے اشیاء خوردونوش کے نرخ میں کمی کے رحجان پر اطمینان کا اظہار کیا ہے۔ صوبہ بھر میں ٹماٹر، پیاز، دھنیا، پودینا، لیموں، لہسن، ادرک، مرچ، آلو سمیت دیگر سبزیاں سستی ہوگئیں۔ پچھلے سال کی نسبت لیموں کی قیمت 85 روپے، ہری مرچ میں 10، ادرک 60 ، پودینا، دھنیا کے نرخ کم ہے۔ آلو 15روپے، پیاز 75روپے، ٹماٹر 5 روپے، دیسی لہسن 75 روپے، چائنہ لہسن 55 روپے، ادرک کے نرخ میں 25 روپے کمی ہوئی ہے- وزیراعلیٰ مریم نوازشریف کی ہدایت پر سبزیوں کی سپلائی مینجمنٹ میں بہتری، عید کے لئے زیادہ سبزیاں پہنچ گئیں۔

لاہور میں آلو،پیاز کے 30 اضافی ٹرک، ٹماٹر کے 13، ادرک کے 2، لہسن کے 6، ہری مرچ کے 7 اورلیموں کے 3 ٹرک پہنچ گئے- دال چنا، ماش، مسور، کالا چنا، بیسن اوردیگر دالوں کے نرخ میں بھی 30روپے تک کمی ہوئی ہے-وزیراعلیٰ مریم نواز شریف نے 9 ضروری سبزیوں کے کم نرخ برقرار رکھنے کیلئے ضروری اقدامات کا حکم دیاہے- وزیراعلیٰ مریم نوازشریف نے پرائس کنٹرول ڈیپارٹمنٹ، کمشنر، ڈپٹی کمشنر اوردیگر انتظامیہ کو نرخ کی مانیٹرنگ کی ہدایت کی ہے۔

مزید برآں وزیراعلیٰ پنجاب مریم نوازشریف نے عید الاضحی پر فول پروف سکیورٹی انتظامات کا حکم دیا ہے-وزیراعلیٰ مریم نوازشریف نے مویشی منڈیو ں میں بھی سکیورٹی بڑھانے کی ہدایت کی-وزیراعلیٰ مریم نوازشریف نے لاہور سمیت دیگر شہروں میں ٹریفک کی مسلسل مانیٹرنگ کا حکم دیا اورلاہور،ملتان اوردیگر بڑے شہروں میں مویشی منڈیوں کے قریب ٹریفک مینجمنٹ کی ہدایت کی-وزیراعلیٰ مریم نوازشریف نے ہر شہر میں ٹرانسپورٹ کے مقررہ کرایوں پر عملدرآمد یقینی بنانے اور بسوں کی ونڈ سکرین پر کرائے نامے،فٹنس سر ٹیفکیٹ چسپا ں کرنے کی ہدایت کی-وزیراعلی مریم نوازشریف نے زائد کرائے واپس کرانے اوروصول کرنے والوں کے خلاف کارروائی کا حکم دیاہے- وزیراعلیٰ مریم نوازشریف نے لائیوسٹاک حکام کو مویشی منڈیوں میں موجودگی یقینی بنانے، انتظامیہ اورپولیس افسران کو فیلڈ میں موجودرہنے کی ہدایت کی- صوبائی، ڈویژنل، ضلعی اور تحصیل سطح پر صورتحال کی مسلسل مانیٹرنگ اور متواتررپورٹ پیش کرنے کی ہدایت کی ہے۔