ہمیں اب ویلفیئر کی طرف بڑھنا ہو گا۔، ڈاکٹر فاروق ستار

اسلام آباد (اُردو پوائنٹ اخبارتازہ ترین - اے پی پی۔ 14 جون2025ء) متحدہ قومی موومنٹ کے رکن، سینئر پارلیمنٹرین ڈاکٹر فاروق ستار نے کہا ہے کہ ہم نے بھارت کیخلاف جس طرح حالیہ معرکہ سر کیا ہے اسی طرح انتہا پسندی، بھوک، افلاس، مہنگائی کے خلاف بھی جنگ جیتنی ہے، ہمیں جنگ سے کامیابی کے بعد اب ویلفیئر کی طرف بڑھنا ہو گا، دنیا میں وہی ملک آزاد ہیں جو معاشی طور پر آزاد و خودمختار ہیں، ہمیں معاشی طور پر خودمختار ہونا ہے، بینظیر انکم سپورٹ پروگرام سے مستفید ہونے والوں کا دوبارہ سروے کیا جائے ۔

ہفتہ کو قومی اسمبلی میں بحث میں حصہ لیتے ہوئے کہا کہ حالیہ پاک بھارت جنگ میں اللہ نے ہمیں بہت بڑی کامیابی عطا کی ہے،اس پر فیلڈ مارشل عاصم منیر، تینوں مسلح افواج نے اپنی پیشہ ورانہ مہارت کا لوہا منوایا، آج اقوام عالم میں ہم سر اٹھا کر چل رہے ہیں، اس پر عاصم منیر، عسکری قیادت اور حکومت پاکستان کو مبارکباد پیش کرتے ہیں۔

(جاری ہے)

انہوں نے کہا کہ اب ہمیں جنگ سے ویلفیئر کی طرف بڑھنا ہے۔

انہوں نے کہا کہ ملک میں متوسط طبقے کو بڑے مسائل کا سامنا ہے۔انہوں نے کہا کہ تنخواہ دار طبقہ کو ٹیکس ریلیف قابل تعریف ہے، ہائوسنگ کے شعبہ میں ٹیکس ریلیف پر ہماری جماعت حکومت کو مبارکباد پیش کرتی ہے ۔ انہوں نے کہا کہ ہم نے انتہا پسندی، بھوک، افلاس، مہنگائی کے خلاف بھی جنگ جیتنی ہے۔دنیا میں وہی ملک آزاد ہیں جو معاشی طور پر آزاد و خود مختارہیں، ہمیں معاشی طور پر خودمختار ہونا ہے۔

انہوں نے کہا کہ سوا 12 سو ارب روپے کا براہ راست ٹیکس ہدف بڑھایا جا رہا ہے۔انہوں نے کہا کہ بڑے زمینداروں پر ٹیکس عائد کیاجائے، زرعی انکم ٹیکس جمع کرنے کا اختیار ایف بی آر کو دیا جائے۔وڈیرہ شاہی کو ٹیکس نیٹ میں لایا جائے، ورنہ عام آدمی اور ریٹلیرز بھی ٹیکس نہیں دیں گے۔ تاجر اپنی صحیح آمدنی ظاہر کریں۔ انہوں نے کہا کہ امت مسلمہ پر کڑے وقت میں پاکستان ساتھ کھڑا ہو گا، ہم ایران پر صیہونی جارحیت کی مذمت کرتے ہیں،ہم ایران اور فلسطین کے مسلمانوں کے ساتھ کھڑے ہیں۔سیلز ٹیکس اور ان ڈائریکٹ ٹیکس میں 1500 ارب روپے کا شارٹ فال ہے۔ انہوں نے کہا کہ ہمیں عوام دوست اقدامات اٹھانے ہوں گے۔تیل وگیس کی قیمتوں میں کمی کی جائے،ڈبل ٹیکس ختم کئے جائیں۔