Live Updates

وزیراعظم کاایران کے صدر ڈاکٹر مسعود پیزشکیان سے ٹیلیفونک رابطہ

پاکستان، اسرائیل کی بلا اشتعال اور بلاجواز جارحیت پر، حکومت ایران ،عوام کیساتھ مکمل یکجہتی میں کھڑا ہے‘شہباز شریف عالمی برادری ،اقوام متحدہ اسرائیل کے جارحانہ رویے ،غیر قانونی اقدامات کے خاتمے کیلئے فوری ،قابل اعتبار اقدامات کریں‘گفتگو صدر پیزشکیان نے مشکل وقت بالخصوص اقوام متحدہ کی سلامتی کونسل میں ایران کیساتھ پاکستان کی حمایت ،یکجہتی پر وزیراعظم کا شکریہ ادا کیا عالمی برادری بالخصوص اسلامی ممالک ان خطرات کا مقابلہ کرنے کے لیے مل جل کر کام کریں، دونوں رہنمائوں کاقریبی رابطے میں رہنے پر اتفاق

ہفتہ 14 جون 2025 20:45

لاہور (اُردو پوائنٹ اخبارتازہ ترین - این این آئی۔ 14 جون2025ء) وزیراعظم محمد شہبازشریف نے اسلامی جمہوریہ ایران کے صدر ڈاکٹر مسعود پیزشکیان سے ٹیلی فون پر بات چیت کی۔ وزیر اعظم شہباز شریف نے کہا کہ پاکستان، اسرائیل کی بلا اشتعال اور بلاجواز جارحیت پر، حکومت ایران اور برادر عوام کے ساتھ مکمل یکجہتی میں کھڑا ہے۔ وزیر اعظم شہباز شریف نے ایران کے خلاف اسرائیلی حملوں کی شدید مذمت کرتے ہوئے اسے ایران کی خودمختاری اور علاقائی سالمیت اور اقوام متحدہ کے چارٹر اور بین الاقوامی قوانین کی مکمل خلاف ورزی قرار دیا ۔

انہوں نے مزید کہا کہ ایران کو اقوام متحدہ کے چارٹر کے آرٹیکل 51 کے تحت اپنے دفاع کا حق حاصل ہے۔ حملوں میں قیمتی جانوں کے ضیاع پر صدر پیزشکیان سے دلی تعزیت کا اظہار کرتے ہوئے وزیراعظم شہباز شریف نے گزشتہ روز اقوام متحدہ کی سلامتی کونسل کے ہنگامی اجلاس میں ایران کے لیے پاکستان کی حمایت کا ذکر کیا۔

(جاری ہے)

وزیر اعظم نے اسرائیل کی اشتعال انگیزی اور مہم جوئی کو علاقائی اور عالمی امن و استحکام کے لیے سنگین خطرہ قرار دیتے ہوئے مذمت کی۔

انہوں نے اسرائیل کی جانب سے بہادر فلسطینیوں کے خلاف ظالمانہ نسل کشی کی بلا روک ٹوک کارروائیوں کی بھی شدید مذمت کی۔ انہوں نے عالمی برادری اور اقوام متحدہ پر زور دیا کہ وہ اسرائیل کے جارحانہ رویے اور اس کے غیر قانونی اقدامات کے خاتمے کے لیے فوری اور قابل اعتبار اقدامات کریں۔ انہوں نے کہا کہ پاکستان خطے میں امن کے فروغ کے لیے پوری طرح پرعزم ہے اور اس تناظر میں اپنا کردار ادا کرنے کے لیے تیار ہے۔

صدر پیزشکیان نے مشکل وقت بالخصوص اقوام متحدہ کی سلامتی کونسل میں ایران کے ساتھ پاکستان کی حمایت اور یکجہتی پر وزیراعظم شہباز شریف کا شکریہ ادا کیا۔ انہوں نے کہا کہ یہ دونوں ممالک کے درمیان قریبی اور برادرانہ تعلقات کا عکاس ہے۔ انہوں نے وزیراعظم کو اسرائیل کے ساتھ بحران پر ایران کے نقطہ نظر سے آگاہ کیا اور عالمی برادری بالخصوص اسلامی ممالک پر زور دیا کہ وہ ان خطرات کا مقابلہ کرنے کے لیے مل جل کر کام کریں۔ دونوں رہنمائوں نے قریبی رابطے میں رہنے پر اتفاق کیا۔