cپاکستان پیپلز پارٹی کی ڈیجیٹل ٹیم کا مرکزی اجلاس

y اسلام آباد (اُردو پوائنٹ اخبارتازہ ترین - آن لائن۔ 15 جون2025ء)پاکستان پیپلز پارٹی (پی پی پی) کی ڈیجیٹل ٹیم کا مرکزی اجلاس آج اسلام آباد میں منعقد ہوا۔ اجلاس میں پارٹی کی ڈیجیٹل حکمت عملی، سوشل میڈیا مہمات، اور عوامی رابطے بڑھانے پر تفصیلی تبادلہ خیال اور مشاورت کی گئی۔اجلاس میں پاکستان پیپلز پارٹی کے مرکزی سیکرٹری اطلاعات ندیم افضل چن، سندھ کے سینئر وزیر شرجیل انعام میمن، گورنر خیبرپختونخوا فیصل کریم کنڈی، ایم این اے قاسم گیلانی، سینیٹر ندیم بھٹو، اور مختلف ڈویڑنز کے ڈیجیٹل میڈیا سربراہان سمیت سینیئر رہنماؤں نے بھرپور شرکت کی، جبکہ برطانیہ، کینیڈا، جرمنی، متحدہ عرب امارات، سعودی عرب، امریکہ اور دنیا کے دیگر ملکوں میں مقیم پی پی پی ڈیجیٹل کارکنان نے زوم کے ذریعے اجلاس میں شرکت کی۔

(جاری ہے)

سندھ کے سینئر وزیر شرجیل انعام میمن نے اجلاس سے خطاب کرتے ہوئے کہا کہ آج کی سیاست میں ڈیجیٹل میڈیا محض اظہار کا ذریعہ نہیں بلکہ ایک طاقتور سیاسی ہتھیار بن چکا ہے۔ نوجوانوں کو حقائق سے روشناس کرانا اور منفی پروپیگنڈے کی حوصلہ شکنی ہماری اولین ترجیح ہے۔ انہوں نے کہا کہ ڈیجیٹل میڈیا کی ٹیم عوام تک پارٹی کا پیغام پہنچانے میں کلیدی کردار ادا کر رہی ہے۔

کچھ عناصر سوشل میڈیا پر نفرت، جھوٹ اور الزامات کی سیاست کر رہے ہیں، لیکن ہم نے دلیل، سچائی اور اخلاق کے ساتھ جواب دینا ہے۔ پاکستان پیپلز پارٹی کے مرکزی سیکرٹری اطلاعات ندیم افضل چن نے کہا کہ دنیا کے بدلتے ہوئے تقاضوں کے مطابق ہمیں چاہئے کہ ہم محض جلسوں اور بیانات پر اکتفا نہ کریں بلکہ سوشل میڈیا پر ایک مربوط، مہذب اور مؤثر بیانیہ تشکیل دیں۔

انہوں نے کہا کہ پارٹی کی پالیسی، کارکردگی، اور جمہوریت کے لئے تاریخی قربانیوں اور جدوجہد کو عوام تک پہنچانا ہم سب کی ذمہ داری ہے۔گورنر خیبرپختونخوا فیصل کریم کنڈی نے کہا کہ خیبرپختونخوا سمیت ملک بھر میں سوشل میڈیا کا کردار ناقابلِ انکار ہے، خیبرپختونخوا جیسے حساس صوبے میں عوامی رائے پر اثر انداز ہونے کے لیے ڈیجیٹل میڈیا ایک بڑا ہتھیار بن چکا ہے۔ بدقسمتی سے کچھ قوتیں جھوٹ اور فیک نیوز کے ذریعے نوجوانوں کو گمراہ کر رہی ہیں، ہمارا فرض ہے کہ ہم عوام کو سچ بتائیں اور قومی اتحاد پر مبنی بیانیے کو فروغ دیں۔ اجلاس میں مختلف تجاویز، تربیتی ورکشاپس، اور ملکی و عالمی سطح پر پارٹی بیانیے کو مؤثر انداز میں اجاگر کرنے پر بھی غور کیا گیا۔