اللہ تعالیٰ کے سامنے جوابدہ ہیں، پنجاب کا زیرو ٹیکس اور سب سے بڑا ڈویلپمنٹ بجٹ دیا ہے، مریم نواز

لاہور(اردوپوائنٹ اخبار تازہ ترین۔16جون 2025)وزیراعلیٰ پنجاب مریم نواز شریف کا کہنا ہے کہ اللہ تعالیٰ کے سامنے جوابدہ ہیں،پنجاب کا زیرو ٹیکس اور سب سے بڑاڈویلپمنٹ بجٹ دیا ہے، یہ بڑی خوشی کی بات ہے مسلسل دوسرے سال پنجاب نے بغیر نئے ٹیکس کے بجٹ پیش کیا ہے، جو عوامی ریلیف کی واضح علامت ہے،پنجاب اسمبلی کے باہر میڈیا سے گفتگو کرتے ہوئے وزیراعلیٰ پنجاب نے کہا کہ رواں سال کے بجٹ میں کوئی نیا ٹیکس عائد نہیں کیا گیا۔

یہ عوام کا پیسہ ہے ایک ایک پائی اللہ تعالیٰ کے سامنے جوابدہ ہو کر استعمال کر رہے ہیں۔ صحت اور تعلیم کے شعبے میں بجٹ کی 77 سالہ تاریخ میں سب سے زیادہ رقم مختص کی گئی ہے۔ٹیکس نیٹ میں توسیع پر توجہ دیں گے۔ٹیکس بڑھانا آسان ہے مگر ہم نے مشکل مگر درست راستہ چنا ہے۔

(جاری ہے)

انہوں نے کہا کہ اللہ کی عطا سے یہ کامیابیاں ممکن ہوئیں۔ نیت نیک ہے، کام جاری رکھیں گے۔

اقتدار اللہ کی امانت اور عوام کی خدمت ہمارا مشن ہے۔قبل ازیں پنجاب کابینہ کے 27ویں اجلاس سے خطاب کرتے ہوئے وزیراعلیٰ پنجاب مریم نواز نے بجٹ کوزیرو ٹیکس اور سب سے بڑا ترقیاتی بجٹ قرار دیا۔ گزشتہ برس کا بجٹ بھی ریکارڈ تھا لیکن اس بار اپنے ہی ریکارڈ توڑ دیں گے۔ انہوں نے اعلان کیا کہ پنجاب میں 100 نئے اختراعی منصوبے شروع کئے گئے ہیں جو اپنی مثال آپ ہیں۔

740 ارب روپے کا سرپلس بجٹ دیا گیا اور آئی ایم ایف کی شرائط بھی پوری کی گئیں۔ ان کا یہ بھی کہنا تھاکہ پنجاب میں ایمرجنسی نافذ کر کے ڈیلیوری دی گئی، ورک ایتھکس بدلے جا چکے ہیں اور ہر افسر، وزیر اور ٹیم نے بھرپور محنت کی ہے۔مریم نواز نے کم از کم اجرت 40 ہزار روپے مقرر کرنے اور اجرتی نظام کو ڈیجیٹل بنانے کی بھی تجویز دی۔وزیراعلیٰ پنجاب نے پی آر اے کی کارکردگی پر عدم اطمینان کا اظہار کرتے ہوئے بہتری کی گنجائش تسلیم کی۔

انہوں نے اعلان کیا کہ کارکردگی کی بنیاد پر سرکاری ملازمین کیلئے ایڈیشنل پرفارمنس بونس کا جائزہ لیا جا رہا ہے۔مریم نواز نے کہا کہ 2025-26 کا بجٹ پاکستان کی تاریخ کا بے مثال بجٹ ثابت ہو گا اور ای ٹینڈرنگ، شفافیت اور گڈ گورننس کی بدولت اب تک کوئی مالیاتی اسکینڈل سامنے نہیں آیا۔انہوں نے کہا کہ 12 ہزار کلومیٹر سڑکوں کی تعمیر و توسیع اور 700 نئی سڑکوں کی تعمیر ایک سنگ میل ہے۔

عید کے موقع پر صوبے بھر میں صفائی کی تاریخی مہم چلا کر نیا ریکارڈ قائم کیا گیا۔ انہوں نے بتایا کہ 94 نئے پراجیکٹس کے ساتھ اس بار ہیلتھ اور ایجوکیشن میں بے مثال سرمایہ کاری کی گئی ہے۔ ہر سرکاری سکول میں ضروری سہولتیں فراہم کرنے کا ہدف مکمل کیا جائے گا اور فری میڈیسن ہر جگہ دستیاب ہو گی۔ گزشتہ 40 سالوں میں جو 40 ہزار گھر نہیں بن سکے وہ ہدف اب پورا کیا جا رہا ہے۔