ممتاز حسین راٹھور ایک مفکر، منصوبہ ساز اور عوامی درد رکھنے والے رہنما تھے،سردار جاوید ایوب

مظفرآباد(اُردو پوائنٹ اخبارتازہ ترین - این این آئی۔ 16 جون2025ء)پاکستان پیپلزپارٹی کے مرکزی سیکرٹری اطلاعات آزاد حکومت ریاست جموں وکشمیر کے وزیر وائلڈ لائف فشریز ترقیاتی ادارہ سردار جاوید ایوب ایڈووکیٹ نے کہا ہے کہ آزاد جموں و کشمیر کے سابق وزیراعظم ممتاز حسین راٹھور کی برسی یہ محض ایک رسم ادا نہیں کی جارہی، بلکہ ایک ایسی عہد آفریں شخصیت کو خراجِ تحسین پیش کیا جا رہا ہے جن کی سیاسی بصیرت، عوامی خدمت دور اندیشی نے ریاست اور عوام کو نئی شناخت اور وقار عطا کیا ممتاز حسین راٹھور محض ایک سیاستدان نہ تھی؛ وہ ایک مفکر، منصوبہ ساز اور عوامی درد رکھنے والے رہنما تھے۔

ان کی زندگی کا ہر لمحہ کشمیری عوام کی فلاح و بہبود کے لیے وقف رہا۔ وزیراعظم کے طور پر ان کے دور میں تعلیمی اصلاحات، بنیادی ڈھانچہ کی ترقی اور مقامی خودمختاری کے وہ خواب دیکھے جو آج بھی ہماری اجتماعی کوششوں کی بنیاد ہیں۔

(جاری ہے)

ان کا ویژن واضح تھا، عوام کو بااختیار بناؤ، ریاست خود ترقی کرے گی۔ان خیالات کا اظہارانھوں نے ممتاز حسین راٹھور کی برسی کے موقع پر اپنے ایک بیان میں کیا ۔

وزیر حکومت نے کہا کہ ان کی شخصیت کی سب سے روشن جہت ان کی سادگی اور عوام سے براہِ راست رابطہ جوئی تھی۔ کبھی بھی اقتدار کے ایوانوں نے انہیں اپنے عوام سے دور نہیں کیا۔ وہ گلیوں، دیہاتوں اور پہاڑی علاقوں میںعوام کی دہلیز تک جا کر مسائل سنا کرتے تھے یہی وجہ تھی کہ عوام انہیں دلوں کا حکمران کہتے ہیں آج جب ہم ریاست کے موجودہ چیلنجز کا سامنا کر رہے ہیں، توان کی سیاسی میراث سے رہنمائی ملتی ہے ان کی رحلت نے ریاست میں ایک خلا پیدا کیا جو آج تک پُر نہیں ہو سکا، مگر ان کے چھوڑے ہوئے مشن کو زندہ رکھنا ہماری اجتماعی ذمہ داری ہے۔

ممتاز حسین راٹھور قائد عوام شہید ذوالفقار علی بھٹو کے ساتھی تھے کیا ہم ان کے خوابوں کو شرمند تعبیر کر پائے ہیں یہ سوال ہر برسی پر ہمیں جھنجوڑتا ہے۔وزیر وائلڈ لائف فشریز ترقیاتی ادارہ نے کہا ہے سابق وزیراعظم آزاد کشمیر و صدر پاکستان پیپلز پارٹی آزاد کشمیر کی 26ویں برسی کے موقع پر اپنے پیغام میں کہا کہ ممتاز حسین راٹھور صرف ایک سیاستدان نہیں بلکہ ایک نظریہ، ایک تحریک اور عوامی امنگوں کے سچے ترجمان تھے۔

اُن کی قیادت میں پاکستان پیپلز پارٹی نے آزاد کشمیر میں نہ صرف سیاسی استحکام حاصل کیا بلکہ عوامی شعور کو بھی بیدار کیا۔انہوں نے کہا کہ راٹھور نے مشکل ترین سیاسی حالات میں بھی اصولوں پر سمجھوتہ نہیں کیا، جمہوریت کی بحالی، اظہارِ رائے کی آزادی اور غریب عوام کے حقوق کے لیے اُن کی جدوجہد ہمیشہ یاد رکھی جائے گی آخر میں انہوں نے کہا کہ ممتاز حسین راٹھور کی برسی صرف ایک رسمی تقریب نہیں بلکہ اُن کی جدوجہد سے سبق لینے اور اُن کے مشن کو آگے بڑھانے کا دن ہے۔ ان کی خدمات آنے والی نسلوں کے لیے مشعلِ راہ ہیں۔