جرمن چانسلر نے ایران کو تباہ کن کارروائی کی کھلی دھمکی دے دی

برلن ( اردوپوائنٹ اخبار تازہ ترین۔ آئی پی اے ۔17 جون 2025ء ) جرمن چانسلر فریڈرک مارس نے ایران کو تباہ کن کاروائی کی کھلی دھمکی دے دی ہے۔ میڈیا رپورٹ کے مطابق جرمن چانسلر نے کہا کہ ایران پیچھے نہ ہٹا تو جوہری پروگرام کا مکمل خاتمہ ہمارے ایجنڈے پر ہے، ایرانی جوہری پروگرام کے خاتمے کا مقصد اسرائیل اکیلے حاصل نہیں کرسکتا۔ ایران باز نہ آیا تو تباہ کن کارروائی ہوگی، ایران اگر نہیں مانا تو جوہری پروگرام مکمل طور تباہ کردیا جائے گا۔

ایرانی حکومت دنیا بھر میں موت اور تباہی پھیلا رہی ہے۔ حماس اور حزب اللہ جیسے گروہوں کے پیچھے تہران کا ہاتھ ہے۔ جرمن چانسلر نے کہا کہ ایران اگر مذاکرات کی ٹیبل پر واپس آئے تو فوجی کارروائی کی ضرور ت نہیں ہوگی۔ اسرائیل کے پاس فوجی سازوسامان زیادہ نہیں لیکن امریکا کے پاس ہے۔

(جاری ہے)

ایران کمزور ہوچکا ہے سفارتی مدد کی پیشکش اب بھی برقرار ہے۔

ایرانی حکومت اب شاید دوبارہ اپنی پرانی طاقت حاصل نہ کرسکے۔ایران کا مستقبل غیریقینی ہوچکا ہے انتظار کرنا ہوگا اور صورتحال کو دیکھنا ہوگا۔کوئی نیا منظر نامہ بنتا ہے تو جرمنی ، فرانس اور برطانیہ سفارتی مدد کو تیار ہوں گے۔ دوسری جانب چین کے صدر شی جن پنگ کا کہنا ہے کہ ہر سلطنت کو زوال کا سامنا کرنا پڑا، دنیا امریکہ کے بغیر بھی آگے بڑھ سکتی ہے۔

اس حوالے سے اپنے ایک بیان میں انہوں نے کہا کہ اگر امریکہ نے دنیا کا احترام کھو دیا تو وہی انجام دیکھے گا جو ماضی کی زوال پذیر سلطنتوں کا ہوا کیوں کہ تاریخ گواہ ہے کہ ہر طاقتور سلطنت نے خود کو ناقابلِ شکست سمجھا مگر ہر ایک کا سورج آخرکار غروب ہوا، آج سے 100 سال پہلے برطانوی سلطنت عالمی تجارت پر چھائی ہوئی تھی، لوگ سمجھتے تھے اس سلطنت کا سورج کبھی غروب نہیں ہوگا لیکن وہ وقت بھی آیا جب برطانیہ عالمی منظرنامے سے پیچھے ہٹ گیا۔

شی جن پنگ نے مزید کہا کہ 200 سال قبل فرانس یورپ کے افق پر غالب تھا اور ایک وقت تھا جب ہسپانوی تخت و تاج منیلا سے لے کر میکسیکو تک حکومت کر رہا تھا، ہسپانوی بادشاہ یہ سمجھتے تھے کہ ان کی عظمت ہمیشہ قائم رہے گی لیکن تاریخ نے ثابت کیا کہ ہر سلطنت کو زوال کا سامنا کرنا پڑا، اسی طرح اگر امریکہ یہ سمجھتا ہے کہ وہ عالمی سیاست و معیشت میں ہمیشہ کے لیے ناگزیر ہے تو وہ ماضی کی ان سلطنتوں سے سبق لے، وقت بدلتا ہے اور قومیں بدلتی ہیں جو قوم دنیا کا احترام نہیں کرتی وہ خود اپنے زوال کی راہ ہموار کرتی ہے۔

علاوہ ازیں چین نے امریکی صدر ڈونلڈ ٹرمپ کے ایرانی دارالحکومت تہران سے شہریوں کو فوری انخلاء کے بیان پر سخت ردعمل ظاہر کرتے ہوئے کہا ہے کہ امریکہ تنازعے کو ہوا دینے کی بجائے کشیدگی میں کمی کے لیے کام کرے، آگ پر تیل ڈالنے، دھمکیاں دینے اور دباؤ بڑھانے سے صورتحال میں بہتری نہیں آئے گی بلکہ اس سے خطے میں تنازعہ مزید گہرا اور وسیع ہو جائے گا، اس لیے عالمی طاقتیں ایران اسرائیل کشیدگی مزید بڑھانے کی بجائے اسے ختم کرنے میں کردار ادا کریں۔