انتہا پسندی اور عالمی طاقت بننے کی خام خیالی بھارت کیلئے سنگین خطرہ

نیویارک (اُردو پوائنٹ اخبارتازہ ترین - اے پی پی۔ 20 جون2025ء) مسلم دشمنی، ہندو انتہا پسندی اور عالمی طاقت بننے کی خام خیالی خود بھارت کیلئے سنگین خطرہ بن گئی ہے۔کشمیرمیڈیاسروس کے مطابق امریکی جریدے فارن افیئرز کی رپورٹ نے مودی کی انتہا پسند پالیسیوں اور سفارتی ناکامیوں پر سنگین سوالات اٹھائے ہیں۔ بھارت میں مودی سرکار کی غیر جمہوری پالیسیوں سے فرقہ وارانہ کشیدگی میں اضافہ اور بدامنی میں شدت آئی ہے جس کے نتیجے میں ملک کی جمہوری ساکھ بری طرح متاثرہوئی ہے ۔

رپورٹ میں کہا گیا ہے کہ دفاعی وسائل کی کمی اور سیاسی خلفشار کے باعث بھارت کا بیرونی اثر و رسوخ کمزور ہوتا جا رہا ہے، بھارت چین کو نیچا دکھانے کے ساتھ ساتھ امریکی بالادستی کو بھی چیلنج کرنا چاہتا ہے۔

(جاری ہے)

معاشی اور عسکری میدان میں چین نے بھارت کو بہت پیچھے چھوڑ دیا ہے،6فیصدکی شرح نمو کے باوجود بھارت چین کے مقابلے میں ایشیا میں بہت پیچھے ہے۔

فارن افیئرز کی رپورٹ کے مطابق میک اِن انڈیا کے تحت ناپید اورنایاب مصنوعات کی تیاری اور تحقیق میں سرمایہ کاری کی کمی بھارت کی ترقی کی راہ میں بڑی رکاوٹیں ہیں۔ یوکرین جنگ کے باوجود بھارت نے روس اور ایران جیسے مغرب مخالف ممالک سے قریبی تعلقات برقرار رکھ کر اسٹریٹیجک خودمختاری پر اصرار جاری رکھا۔مودی سرکار کی ہندوتوا پالیسی نے بھارت کے جمہوری اداروں کو کمزور کیا ہے اور ملک کی سیکولر شناخت شدید بحران کا شکار ہے۔

اسی طرح ہندوتوا نظریہ بھارت میں فرقہ وارانہ کشیدگی اور ہمسایہ ممالک کے ساتھ تعلقات میں شدید تنا ئوکا باعث بن رہا ہے۔ مودی سرکار میں آئینی تبدیلیوں کی وجہ سے بھارت کا سیکولر آئینی ڈھانچہ کمزور ہو چکا ہے اور ریاستی ادارے سیاسی مفادات کے ہتھیار بنائے جا چکے ہیں۔رپورٹ میں کہا گیا ہے کہ ٹیکس اور قانون نافذ کرنے والے اداروں کو اپوزیشن اور سول سوسائٹی کے خلاف ہتھیار کے طور پر استعمال کیاجارہا ہے ۔

مودی سرکار نے پارلیمنٹ اور عدلیہ جیسے جمہوری توازن کے اہم ستونوں کو بھی کمزور کر دیا ہے۔جریدے فارن افیئرز کے مطابق بی جے پی نے پارلیمانی اکثریت عوامی مینڈیٹ سے نہیں بلکہ انتخابی نظام کی خامیوں سے فائدہ اٹھا کر حاصل کی، ہندوتوا نظریے کو عوام کی اکثریت کی حمایت حاصل نہیں اور سرکار و عوام کے درمیان بڑھتا ہوا فاصلہ اس کا واضح ثبوت ہے۔

رپورٹ میں بتایا گیا ہے کہ فرقہ وارانہ تقسیم سے بھارت کی اندرونی سلامتی اور عالمی اثر ورسوخ کو شدید خطرہ لاحق ہے، بی جے پی کی نفرت بڑھکانے کی پالیسی بھارت کے پہلے سے کمزور اداروں کو مزید نقصان پہنچا رہی ہیں، جو شمال مشرقی بھارت اورمقبوضہ کشمیر میں مزاحمت کو مزید تیز کر سکتی ہے ۔مودی حکومت کی مسلمانوں کے خلاف تعصب پر مبنی پالیسیاں پاکستان اور بنگلا دیش سے سفارتی تعلقات کو خراب کرنے کا باعث ہیں ۔

فارن افیئرز کی رپورٹ کے مطابق غیر جمہوری بھارت ایک کمزور بھارت ہوگا، چوتھی بڑی معیشت ہونے کے دعوے کے باوجود معیارِ زندگی اور قومی طاقت میں چین، امریکا اور یورپ سے پیچھے رہے گا۔ بھارت جنوبی ایشیا میں بھی غالب طاقت بننے میں ناکام رہا، مشرق وسطی و مشرقی ایشیا دونوں میں ناکامی بھارت کی کمزور حکمت عملی کو ظاہر کرتی ہے۔مودی سرکار کی آمرانہ پالیسیاں بھارت کی قومی یکجہتی اور خطے کے امن کے لیے سنگین خطرہ ہیں۔