علمی اداروں کا ’خاتمہ‘: کفایت شعاری یا قومی شناخت پر حملہ؟

اسلام آباد (اُردو پوائنٹ ۔ DW اردو۔ 21 جون 2025ء) سینیٹر عرفان صدیقی کی حالیہ پارلیمانی تقریر نے ایک اہم بحث کو جنم دیا ہے۔ کیا چند کروڑ روپے بچانے کے لیے علمی و ادبی اداروں کو بند کرنا کفایت شعاری ہے یا علم دشمنی؟ سوال یہ ہے کہ حکومت دیگر اخراجات کم کرنے کے بجائے ان اداروں کو کیوں نشانہ بنا رہی ہے؟

حکومتی سفارشات اور تنازع

وفاقی حکومت کی رائٹ سائزنگ کمیٹی نے حال ہی میں پاکستان اکادمی ادبیات، اردو سائنس بورڈ، اردو لغت بورڈ اور اقبال اکادمی کو ادارہ برائے فروغ قومی زبان میں ضم کرنے کی تجویز پیش کی ہے۔

(جاری ہے)

13 جون 2025 کو سینیٹ اجلاس میں مسلم لیگ (ن) کے سینیئر رہنما عرفان صدیقی نے اس فیصلے کی شدید مخالفت کی۔ انہوں نے کہا: ”کیا ہم دنیا کے سامنے دہشت گردی، غربت اور مہنگائی کا امیج پیش کرنا چاہتے ہیں؟ یہ ادارے ہماری قومی شناخت ہیں۔

بیوروکریسی کی دیرینہ خواہش؟

جن اداروں کو بند یا ضم کرنے کی بات کی جا رہی ہے، ان میں اردو سائنس بورڈ بھی شامل ہے، جو 1962 میں قائم ہوا تھا۔ اس ادارے کا مقصد سائنسی علوم کو سادہ اردو میں منتقل کرنا اور سائنس کی نصابی کتب کے لیے رہنمائی فراہم کرنا ہے۔

اردو سائنس بورڈ کے سابق ڈائریکٹر جنرل اور معروف نقاد ناصر عباس نیر نے ڈی ڈبلیو اردو سے بات کرتے ہوئے کہا: ”بیوروکریسی پندرہ بیس سال سے ان اداروں کو ختم کرنے کی کوشش کر رہی ہے۔ چند سال قبل عشرت حسین، جو اس وقت مشیر برائے ادارہ جاتی اصلاحات تھے، نے مجھ سے کہا کہ اردو سائنس بورڈ سے کون سا سائنسی انقلاب آیا ہے؟ اسے بند کر دینا چاہیے۔

انہوں نے مزید کہا کہ بیوروکریسی اکثر ان اداروں کو مالی نفع و نقصان کے ترازو میں تولتی ہے، حالانکہ علم اور تجارت دو الگ چیزیں ہیں۔ ناصر عباس نیر کے مطابق: ”کچھ اداروں کی اہمیت روپے پیسے سے کہیں بڑھ کر ہوتی ہے۔

اردو اور معاشرہ - ڈاکٹر مبارک علی کی تحریر

سماجی دانشور اور مصنف ڈاکٹر صلاح الدین درویش نے ڈی ڈبلیو اردو سے کہا: ''ان پانچ اداروں کا سالانہ بجٹ تقریباً 50 سے 60 کروڑ روپے ہے۔ یہ کوئی بڑی رقم نہیں۔ بیوروکریسی اور اشرافیہ اس سے زیادہ تو اپنی چائے اور بسکٹ پر خرچ کر دیتی ہے۔

یونیورسٹیوں میں ضم کرنے کا تنازع

رائٹ سائزنگ کمیٹی کی تجویز میں یہ بھی شامل ہے کہ ان اداروں کو ایک ادارے میں ضم کر کے کسی یونیورسٹی کے حوالے کر دیا جائے۔ تاہم ماہرین اسے غیر دانشمندانہ قرار دیتے ہیں۔

پاکستان اکادمی ادبیات کی چیئرپرسن ڈاکٹر نجیبہ عارف، جو یونیورسٹیوں میں تدریس کے تجربے کی رہنما ہیں، کہتی ہیں: ''یونیورسٹی کا دائرہ کار قومی یا بین الاقوامی اداروں جیسا نہیں ہوتا۔

ناصر عباس نیر کا کہنا ہے کہ یونیورسٹیوں میں ضم کرنے کا مطلب ان اداروں کو مرحلہ وار ختم کرنا ہے۔

خاتمہ نہیں، اصلاحات کی ضرورت

ڈاکٹر صلاح الدین درویش کہتے ہیں کہ ان اداروں میں اصلاحات کی ضرورت ہے، لیکن انہیں ختم کرنا کوئی حل نہیں۔ ان کے مطابق: ”ان اداروں کو حقیقی ادبی اور جمہوری بنانے کے لیے اہل قلم کی رکنیت پر مبنی نظام قائم کیا جائے اور چیئرمین کا انتخاب ووٹنگ سے ہو۔

ناقابل تلافی نقصان کا خدشہ

کیا ان اداروں کے خاتمے سے علمی و ادبی نقصان ہو گا؟ ڈاکٹر نجیبہ عارف اس کا جواب اثبات میں دیتی ہیں۔ وہ کہتی ہیں: ”اکادمی ادبیات واحد وفاقی ادارہ ہے، جو تمام صوبوں اور علاقوں کی زبانوں کے ساتھ تعاون کرتا ہے۔

ادارت: امتیاز احمد