Live Updates

غزہ: بھوک سے لوگوں کی ہلاکتوں میں اضافہ، انروا

یو این اتوار 22 جون 2025 01:15

اسلام آباد (اُردو پوائنٹ ۔ UN اردو۔ 22 جون 2025ء) غزہ میں انسانی حالات متواتر بگڑ رہے ہیں جہاں 20 لاکھ سے زیادہ آبادی کو شدید بھوک کا سامنا ہے جبکہ محدود مقدار میں آنے والی خوراک کے حصول کی کوشش میں آئے روز بڑی تعداد میں لوگ ہلاک ہو رہے ہیں۔

فلسطینی پناہ گزینوں کے لیے اقوام متحدہ کے امدادی ادارے (انروا) کے ڈائریکٹر جنرل فلپ لازارینی نے کہا ہے کہ غزہ میں امداد کی فراہمی کے لیے اسرائیل اور امریکہ کی جانب سے لاگو کردہ نیا نظام شہریوں کے لیے گویا موت کا پھندا ہے۔

اس اقدام کے نتیجے میں جتنے لوگوں کی جانیں بچائی جا سکتی ہیں اس سے کہیں بڑی تعداد میں شہری ہلاک ہو رہے ہیں۔

ترکیہ کے شہر استنبول میں اسلامی تعاون تنظیم کے اجلاس سے خطاب کرتے ہوئے انہوں نے بتایا کہ دو سال سے جاری جنگ میں غزہ کے 55 ہزار شہری ہلاک ہو چکے ہیں جن میں بڑی تعداد خواتین اور بچوں کی ہے۔

(جاری ہے)

جو لوگ تاحال زندہ ہیں ان کی زندگی ناقابل بیان تکالیف اور شدید نقصان کے باعث ہمیشہ کے لیے تبدیل ہو گئی ہے۔

مغربی کنارے میں نقل مکانی اور شہری تنصیبات کی تباہی کے ذریعے فلسطینی کیمپوں کی آبادی میں تبدیلیاں آ رہی ہیں جو کہ مسئلے کے دو ریاستی حل کے تحت فلسطینی ریاست کے امکانات اور فلسطینیوں کی پناہ گزین حیثیت کو ختم کرنے کی منظم کوشش ہے۔

'انروا' کی مشکلات

فلپ لازارینی نے کہا کہ 'انروا' بھی اس جنگ کا نشانہ ہے۔ 7 اکتوبر 2023 کےبعد اس کے 318 اہلکار اسرائیلی حملوں میں ہلاک ہو چکے ہیں۔ ادارے کو بدنام کرنے کی مہم بھی چلائی جا رہی ہے جبکہ اسے فراہم کیے جانے والے مالی وسائل میں کمی آ گئی ہے۔

انہوں نے بتایا کہ ان تمام مشکلات اور دباؤ کے باوجود ادارہ فلسطینیوں کو ضروری خدمات مہیا کر رہا ہے جن میں روزانہ 15 ہزار سے زیادہ طبی مشورے، کوڑا کرکٹ اٹھانے کا انتظام اور پناہ گاہوں میں ضروری مدد کی فراہمی بھی شامل ہے۔

کمشنر جنرل کا کہنا تھا کہ ادارے کے مالی حالات کمزور ہیں اور مزید وسائل فراہم نہ کیے جانے کی صورت میں ایسے فیصلے لینا پڑیں گے جس سے پورے خطے میں امدادی کارروائیاں متاثر ہوں گی۔

انہوں نے اقوام متحدہ کے رکن ممالک سے اپیل کی ہے کہ وہ اس معاملے میں فوری اقدامات اٹھائیں۔ 'انروا' کی خدمات میں اچانک کمی کا نتیجہ فلسطینیوں کی تکالیف اور مایوسی میں اضافے کی صورت میں نکلے گا جس سے ہمسایہ ممالک میں بھی بے چینی جنم لے گی جبکہ خطہ اس صورتحال کا متحمل نہیں ہو سکتا۔