ایران کے مشرق وسطیٰ پرحملے کے بعد عالمی مارکیٹ میں تیل کی قیمتیں گرگئیں

اسلام آباد (اُردو پوائنٹ اخبارتازہ ترین۔ 23 جو ن 2025ء) ایران کے مشرق وسطیٰ پرحملے کے بعد عالمی مارکیٹ میں تیل کی قیمتیں گر گئی ہیں۔ غیرملکی میڈیا کے مطابق ایران کے مشرق وسطیٰ پرحملے کے بعد عالمی مارکیٹ میں تیل کی قیمتیں گرنے کا رجحان دیکھا گیا۔ برینٹ کروڈ کی قیمت میں تقریباً 5 فیصد کمی ہوگئی ہے جس کے باعث تیل کی قیمت 72 ڈالر فی بیرل سے بھی نیچے آگئی ہے۔

اس برعکس گزشتہ روز آئل مارکیٹ کے ماہرین کا کہنا تھا کہ اتوار کی شام تیل کی تجارت دوبارہ شروع ہوگی تو امریکا کے ایران پر حملے کے بعد تیل کی قیمت فی بیرل 3 سے 5 ڈالر تک بڑھنے کا امکان ہے اور اس میں مزید اضافہ اس وقت تک نہیں ہوگا، جب تک ایران کوئی سخت جواب نہ دے یا تیل کی سپلائی میں کوئی بڑا خلل پیدا نہ ہوجائے۔

(جاری ہے)

برطانوی خبر رساں ادارے کی رپورٹ کے مطابق ایران اوپیک کا تیسرا بڑا خام تیل پیدا کرنے والا ملک ہے۔

جیوپولیٹیکل تجزیہ کے سربراہ اور سابق اوپیک اہلکار، ریسٹڈ کے جارج لیون نے کہا کہ تیل کی قیمتوں میں اچانک اضافہ متوقع ہے، حتیٰ کہ ایران کی جانب سے اگر فوری جواب نہ بھی دیا گیا تو مارکیٹس جیوپولیٹیکل خطرے کا ایک زیادہ پریمیم شامل کرنے کا رجحان رکھیں گی۔ یاد رہے ایران کے پاسداران انقلاب نے قطر میں امریکی فوجی اڈے پر حملے کی تصدیق کردی ہے۔

عرب میڈیا کے مطابق ترجمان ایرانی پاسداران انقلاب کا کہنا ہے کہ امریکی اڈے پر حملے دوست اور برادر ملک قطر کیلئے خطرہ نہیں، امریکی اڈے جنگ بھڑکانے والی حکومت کی کمزوری ہیں طاقت نہیں۔ ایرانی پاسداران انقلاب کی جانب سے قطر میں العدید ایئربیس کو نشانہ بنایا گیا۔ اسی طرح قطر کے وزیردفاع کے مطابق دفاعی نظام نے امریکی فوجی اڈے پر میزائل حملے کو روک دیا۔

میڈیا کے مطابق وزیردفاع قطر کا کہنا ہے کہ ایرانی حملے کے بعد جواب دینے کا حق محفوظ رکھتے ہیں۔ ایرانی اقدامات سے خطے میں سلامتی اور استحکام کو نقصان پہنچے گا، قطر کی فضائی حدود اور علاقہ محفوظ ہے۔ ایرانی میزائل حملوں میں کوئی ہلاکت یا زخمی نہیں ہوا۔ عرب میڈیا کے مطابق دوحہ میں ایئرڈیفنس سسٹ مفعال کردیا گیا۔ مزید برآں ایران نے قطر میں امریکی فوجی اڈے پر میزائل حملہ کر دیا۔

تفصیلات کے مطابق غیر ملکی میڈیا رپورٹس میں بتایا گیا ہے کہ ایران نے خلیجی ملک قطر میں امریکا کے فوجی اڈوں پر حملہ کر دیا ہے۔ غیر ملکی میڈیا کے دعوے کے مطابق ایران کی جانب سے قطر میں امریکی فوجی اڈوں پر 6 بیلسٹک میزائل داغے گئے۔ قطر کے دارالحکومت میں زور دار دھماکوں کی آوازیں سنی گئی ہیں۔ ان حملوں کے بعد دوحہ میں فضائی دفاعی نظام فعال کر دیا گیا۔

قطر کے علاوہ عراق میں بھی امریکی فوجی اڈے پر میزائل حملے کی اطلاعات ہیں، جبکہ بحرین میں بھی سائرن بج اٹھے۔ اس سے قبل امریکا کےایران پر حملے کے بعد مشرق وسطٰی کی صورتحال مزید کشیدہ ہو جانے پر قطر کی جانب سے ہنگامی فیصلہ کیا گیا۔ خلیج ٹائمز کے مطابق قطر نے ہنگامی طور پر اپنے ملک کی فضائی آمد و رفت معطل کرنے کا اعلان کیا۔ اس حوالے سے قطری حکام کا کہنا ہے کہ خطے کی کشیدہ صورتحال کے باعث رہائشیوں اور مسافروں کی حفاظت کیلئے فضائی آمد و رفت معطل کر دی گئی، یہ فیصلہ عارضی ہے، خطے کی صورتحال کا بغور جائزہ لے رہے ہیں۔