ایران، اسرائیل جنگ بندی،عالمی منڈی میں خام تیل کی قیمتوں میں بڑی کمی، دنیا بھر کی سٹاک مارکٹس میں تیزی

خام تیل برینٹ کی قیمت تقریباً 9 فیصد گر گئی قیمت 70 ڈالر فی بیرل پر آگئی، امریکہ کی سٹاک مارکیٹس میں نمایاں اضافہ ریکارڈ، ہانگ کانگ کا ہینگ سینگ انڈیکس 2 فیصد بڑھ گیا، چین کا شنگھائی انڈیکس 1 فیصد اوپر آ گیا

فیصل علوی منگل 24 جون 2025 11:21

لاہور(اردوپوائنٹ اخبار تازہ ترین۔24جون 2025)ایران،اسرائیل جنگ بندی،عالمی منڈی میں خام تیل کی قیمتوں میں بڑی کمی دیکھنے میں آئی جبکہ دنیا بھر کی سٹاک مارکٹس میں تیزی آ گئی،عالمی منڈی میں خام تیل برینٹ کی قیمت تقریباً 9 فیصد گر گئی جس کے بعد خام تیل برینٹ کی قیمت 70 ڈالر فی بیرل پر آگئی ہے، عالمی منڈی میں ڈبلیو ٹی آئی خام تیل کی قیمت 7.22 فیصد کم ہو کر 68.51 ڈالر فی بیرل پر آگئی ہے۔

رپورٹ کے مطابق ایران اسرائیل جنگ بندی کے بعد خطے میں استحکام کی امید نے سرمایہ کاروں کو پر اعتماد کیا ہے جس سے نہ صرف سٹاک مارکیٹس میں بہتری آئی ہے بلکہ تیل کی ترسیل میں رکاوٹوں کے خدشات بھی کم ہوگئے ہیں۔ اگر جنگ بندی مستقل رہی تو آئندہ دنوں میں عالمی معیشت میں مزید بہتری کے آثار پیدا ہو سکتے ہیں۔

(جاری ہے)

دوسری جانب ایران اور اسرائیل کے درمیان جنگ بندی کے بعد دنیا بھر کی سٹاک مارکیٹس میں نمایاں تیزی دیکھی گئی ہے جب کہ عالمی سطح پر تیل کی قیمتوں میں بھی کمی کا رجحان سامنے آیا ہے۔

سرمایہ کاروں میں اعتماد کی بحالی کے باعث عالمی منڈیوں میں مثبت رجحان غالب رہا۔امریکہ کی سٹاک مارکیٹس میں نمایاں اضافہ ریکارڈ کیا گیا جہاں ایس اینڈ پی 500 انڈیکس میں ایک فیصد، نیسڈیک میں 0.9 فیصد اور ڈاؤ جونز انڈسٹریل ایوریج میں 0.89 فیصد کا اضافہ ہوا۔ سرمایہ کاروں نے جنگ کے خاتمے کو معیشت کیلئے خوش آئند قرار دیا جس سے مارکیٹوں میں بحالی کی فضا قائم ہوئی۔

ایشیا کی مارکیٹس نے بھی مثبت رجحان اختیار کیا۔ ہانگ کانگ کا ہینگ سینگ انڈیکس 2 فیصد بڑھ گیا، چین کا شنگھائی انڈیکس 1 فیصد اوپر آیا، جاپان کا نکی 225 انڈیکس میں بھی 1 فیصد اضافہ ہوا جب کہ انڈونیشیا کا آئی ڈی ایکس کمپوزٹ انڈیکس 1.6 فیصد بڑھ گیا۔اس کے ساتھ ساتھ ایران اسرائیل سیزفائر کے بعد پاکستان اسٹاک مارکیٹ میں زبردست تیزی دیکھی جارہی ہے،ہنڈریڈ انڈیکس میں مارکیٹ کھلتے ہی ایک ساتھ چار حدیں بحال ہوگئیں،100انڈیکس میں 4 ہزار 332 پوائنٹس کا اضافہ ہوا ہے۔

سٹاک تجزیہ کاروں کا کہنا ہے کہ آج مارکیٹ کے پوری قوت سے ری باؤنڈ کرنے کی توقع ہے۔گزشتہ کاروباری ہفتے کے آخری روز پاکستان سٹاک مارکیٹ میں ہنڈرڈ انڈیکس 20 پوائنٹس اضافے کیساتھ ایک لاکھ 20 ہزار 23 پوائنٹس کی سطح پر بند ہوا تھا۔