Live Updates

اسرائیل ایران جنگ بندی میں غزہ اور فلسطین کا حل بھی شامل کیا جائے، سردار عتیق احمد خان

منگل 24 جون 2025 15:17

مظفرآباد (اُردو پوائنٹ اخبارتازہ ترین - این این آئی۔ 24 جون2025ء)صدر مسلم کانفرنس و سابق وزیراعظم آزادکشمیر سردار عتیق احمد خان نے کہا ہے کہ اسرائیل اور ایران کے درمیان ممکنہ جنگ بندی صرف وقتی ریلیف نہیں ہونی چاہیے، بلکہ اس میں غزہ میں جنگ بندی، مظلوم فلسطینی عوام کے تحفظ اور مسئلہ فلسطین کے دو ریاستی حل کو بھی شامل کیا جانا چاہیے۔ اگر فلسطین کے مسئلے کو مستقل بنیادوں پر حل نہ کیا گیا تو مشرق وسطیٰ میں پائیدار امن کا قیام ممکن نہیں ہوگا۔

انہوں نے کہا کہ اسرائیل کی جانب سے مسلسل جارحیت اور مسلم دنیا میں کشیدگی پیدا کرنا، درحقیقت اس کے توسیع پسندانہ عزائم کا حصہ ہے۔ اسرائیل ایک طرف ایران کے خلاف عسکری کارروائیاں کر رہا ہے اور دوسری طرف فلسطین میں نہتے شہریوں، بچوں اور خواتین پر ظلم ڈھا رہا ہے، جو کہ انسانیت اور عالمی قوانین کے سراسر خلاف ہے۔

(جاری ہے)

سردار عتیق احمد خان نے زور دیا کہ ایران کو اپنے دفاع کا پورا حق حاصل ہے، اور اسرائیل کی جارحیت خطے میں ایک بڑی عالمی جنگ کا پیش خیمہ بن سکتی ہے۔

انہوں نے کہا کہ اسرائیل اپنے گریٹر اسرائیل کے منصوبے کے تحت خطے میں خوف اور بدامنی پھیلانا چاہتا ہے، جس کی روک تھام اب پوری امت مسلمہ کی مشترکہ ذمہ داری ہے۔انہوں نے تحریک آزادی کشمیر کا ذکر کرتے ہوئے کہا کہ کشمیر اور فلسطین کے مسائل ایک جیسے ہیں، دونوں جگہ مظلوم اقوام قابض افواج کے جبر کا سامنا کر رہی ہیں۔ عالمی طاقتوں کی خاموشی ان مظالم کی پشت پناہی کے مترادف ہے۔

انہوں نے کہا کہ کشمیری عوام فلسطینیوں کے ساتھ مکمل اظہارِ یکجہتی کرتے ہیں اور ہر محاذ پر ان کی حمایت جاری رکھیں گے۔سردار عتیق احمد خان نے پاک فوج کو خراج تحسین پیش کرتے ہوئے کہا کہ پاکستان کی مسلح افواج عالم اسلام کا فخر ہیں۔ انہوں نے کہا کہ موجودہ عالمی صورتحال میں ہمیں اپنی افواج پر فخر ہے جو ہر چیلنج سے نمٹنے کی صلاحیت رکھتی ہیں اور پاکستان کے دفاع کی مضبوط ضمانت ہیں۔انہوں نے اقوام متحدہ، او آئی سی اور عالمی طاقتوں سے مطالبہ کیا کہ وہ اسرائیل کو لگام دیں اور فلسطین سمیت کشمیر کے مسئلے کو اقوام متحدہ کی قراردادوں کے مطابق حل کروانے میں کردار ادا کریں تاکہ دنیا کو تیسری عالمی جنگ کے خطرے سے بچایا جا سکے۔