Live Updates

ایرانی حملے پر حیرت ہوئی، جواب دینے کی صلاحیت ہے لیکن خطے میں امن چاہتے ہیں، قطری وزیراعظم

ایران نے حملہ کرکے قطرکی خودمختاری کو نقصان پہنچایا، ایرانی حملہ قطر کی خودمختاری اور علاقائی سالمیت کی کھلی خلاف ورزی ہے؛ شیخ محمد بن عبدالرحمان آل ثانی کی پریس کانفرنس

ساجد علی منگل 24 جون 2025 15:17

ایرانی حملے پر حیرت ہوئی، جواب دینے کی صلاحیت ہے لیکن خطے میں امن چاہتے ..

دوحہ ( اُردو پوائنٹ اخبارتازہ ترین۔ 24 جون 2025ء ) قطر کے وزیراعظم شیخ محمد بن عبدالرحمان آل ثانی کا کہنا ہے کہ ایران کے حملے پر حیرت ہوئی، قطر کی ریاست پر حملہ ناقابل قبول اور سفارتی آداب کی خلاف ورزی ہے، جواب دینے کی صلاحیت ہے لیکن خطے میں امن چاہتے ہیں۔ دوحہ میں لبنان کے وزیراعظم کے ہمراہ مشترکہ پریس کانفرنس کے دوران انہوں نے کہا کہ قطری ریاست پر حملہ ناقابل قبول ہے، ایران کے حملے سے ہمیں حیرت ہوئی کیوں کہ قطر نے تو ایران پر اسرائیلی حملے کی مذمت کی تھی، اب ایران کے قطر پر حملے کی مذمت کرتے ہیں، قطری ایئر ڈیفنس نے کامیابی سے ایرانی حملہ ناکام بنایا، ایرانی حملے کے دفاع میں قطری فوج کے کردار کو سراہتے ہیں۔

قطری وزیراعظم کا کہنا ہے کہ ایران نے امریکی اڈے پر حملہ کرکے قطرکی خودمختاری کو نقصان پہنچایا، ایرانی حملہ قطر کی خودمختاری اور علاقائی سالمیت کی کھلی خلاف ورزی ہے، ایرانی پاسداران انقلاب کا حملہ خطے کے امن کے لیے خطرہ ہے، اس حملے پر ردعمل میں قطر کا ساتھ دینے پر خلیج تعاون کونسل کی دوست ریاستوں کا شکریہ ادا کرتے ہیں، قطر اپنے علاقوں کی حفاظت کی پوری صلاحیت رکھتا ہے، بین الاقوامی قوانین کے تحت مناسب جواب دینے کا حق محفوظ رکھتے ہیں لیکن خطے میں امن چاہتے ہیں۔

(جاری ہے)

واضح رہے کہ گزشتہ رات ایران نے خلیجی ملک قطر میں امریکا کے فوجی اڈوں پر حملہ کیا، ایران کی جانب سے قطر میں امریکی فوجی اڈوں پر 6 بیلسٹک میزائل داغے گئے، جس کی وجہ سے قطر کے دارالحکومت میں زور دار دھماکوں کی آوازیں سنی گئیں، ان حملوں کے بعد دوحہ میں فضائی دفاعی نظام فعال کر دیا گیا، قطر کے علاوہ عراق میں بھی امریکی فوجی اڈے پر میزائل حملے کیے گئے جب کہ بحرین میں بھی سائرن بج اٹھے۔