سردار عتیق احمد خان سے مسلم کانفرنس رہنماؤں کی ملاقات، خطے کی سیاسی صورتحال، کشمیر و فلسطین پر تفصیلی گفتگو

بدھ 25 جون 2025 19:15

مظفرآباد/راولپنڈی (اُردو پوائنٹ اخبارتازہ ترین - این این آئی۔ 25 جون2025ء)صدر مسلم کانفرنس و سابق وزیراعظم آزادکشمیر سردار عتیق احمد خان سے مجاہد منزل راولپنڈی میں پارٹی کی سیکرٹری جنرل مہرالنساء، سینئر رہنما سردار ارشاد خان، سردار نواز عباسی اور رانا غلام حسین نے اہم ملاقات کی۔ ملاقات میں پارٹی امور، آزادکشمیر کی موجودہ سیاسی صورتحال، تحریک آزادی کشمیر، فلسطین و غزہ کی صورت حال اور ایران اسرائیل کشیدگی پر تفصیلی تبادلہ خیال کیا گیا۔

اس موقع پر صدر مسلم کانفرنس سردار عتیق احمد خان نے کہا کہ موجودہ عالمی حالات میں مسلم امہ کو باہمی اتحاد اور یکجہتی کی اشد ضرورت ہے۔ اسرائیل کی جانب سے نہ صرف فلسطینی عوام پر ظلم کیا جا رہا ہے بلکہ ایران کے خلاف بھی مسلسل جارحیت کے ذریعے پورے خطے کو جنگ کی طرف دھکیلا جا رہا ہے، جو عالمی امن کے لیے سنگین خطرہ ہے۔

(جاری ہے)

انہوں نے کہا کہ غزہ میں انسانی المیہ جنم لے چکا ہے، ہزاروں بے گناہ شہید ہو چکے ہیں، جن میں بڑی تعداد خواتین اور بچوں کی ہے، مگر عالمی ضمیر خاموش تماشائی بنا ہوا ہے۔

انہوں نے زور دیا کہ فلسطین کا مسئلہ صرف عرب دنیا کا نہیں، بلکہ پوری امت مسلمہ کا مسئلہ ہے۔ کشمیر اور فلسطین کی تحریکیں ایک ہی مقصد، یعنی آزادی اور خودارادیت کی جدوجہد کی علامت ہیں۔ملاقات میں شریک رہنماؤں نے آزادکشمیر کی سیاسی صورتحال پر بھی تفصیلی گفتگو کی اور اس عزم کا اظہار کیا کہ مسلم کانفرنس عوامی حقوق کے تحفظ، ریاستی تشخص، نظریاتی اساس اور تحریک آزادی کشمیر کے مؤقف پر کسی قسم کا سمجھوتہ نہیں کرے گی۔

محترمہ مہرالنساء نے کہا کہ مسلم کانفرنس ایک نظریاتی تحریک ہے جس نے ہمیشہ اصولی سیاست کی ہے، اور یہ پارٹی کشمیری عوام کی آواز اور شناخت ہے۔ رہنماؤں نے کہا کہ اس نازک وقت میں پوری مسلم دنیا کو ایک مؤقف پر متحد ہو کر اسرائیل کی جارحیت کو روکنا ہوگا۔صدر مسلم کانفرنس سردار عتیق احمد خان نے پاک فوج کو خراجِ تحسین پیش کرتے ہوئے کہا کہ موجودہ حالات میں پاک فوج کا مضبوط اور منظم ہونا پاکستان اور آزادکشمیر کے تحفظ کی ضمانت ہے۔ انہوں نے کہا کہ دشمن قوتیں پاکستان اور مسلم دنیا کو غیر مستحکم کرنا چاہتی ہیں، مگر ان شاء اللہ ہم ان کے ناپاک عزائم کو کبھی کامیاب نہیں ہونے دیں گے۔