Live Updates

سردار عتیق احمد خان کی جنوبی وزیرستان واقعے کی شدید مذمت، شہداء کو خراج عقیدت

اتوار 29 جون 2025 14:25

مظفرآباد (اُردو پوائنٹ اخبارتازہ ترین - این این آئی۔ 29 جون2025ء)صدر مسلم کانفرنس و سابق وزیراعظم آزاد کشمیر سردار عتیق احمد خان نے جنوبی وزیرستان میں سیکیورٹی فورسز پر دہشتگردوں کے حملے پاک فوج کے جوانوں کی شہادت پر شدید افسوس اور مذمت کا اظہار کیا ہے۔ انہوں نے کہا کہ وطن کے ان سپوتوں کی قربانیاں رائیگاں نہیں جائیں گی، پوری قوم ان کے شجاعانہ کردار پر فخر کرتی ہے۔

اپنے جاری کردہ بیان میں سردار عتیق احمد خان نے کہا کہ دشمن عناصر، خصوصاً بھارت کی سرپرستی میں سرگرم دہشتگرد گروہ پاکستان کے امن کو سبوتاژ کرنے کی مذموم کوشش کر رہے ہیں، مگر ہماری بہادر مسلح افواج ان کے ہر وار کو ناکام بنا رہی ہیں۔ انہوں نے کہا کہ پاکستانی فوج ہر قیمت پر مادرِ وطن کا دفاع کرنا جانتی ہے۔

(جاری ہے)

قوم اپنے شہداء کو سلام پیش کرتی ہے اور ان کے اہلِ خانہ کے غم میں برابر کی شریک ہے۔

انہوں نے کہا کہ پاک فوج نہ صرف پاکستان بلکہ پوری امت مسلمہ کی امید کا مرکز ہے، جس پر پوری قوم کو ناز ہے۔صدر مسلم کانفرنس نے مزید کہا کہ دہشتگردی کے خلاف جنگ میں پاکستان نے جو قربانیاں دی ہیں، وہ تاریخ میں سنہری حروف سے لکھی جائیں گی۔ دشمن چاہے جتنی بھی سازشیں کرے، ہماری صفوں میں انتشار پیدا نہیں کر سکتا۔ قوم متحد ہے اور پاک فوج کے شانہ بشانہ کھڑی ہے۔