بیرون ملک سے ڈی پورٹ بھکاریوں کی گرفتاری یقینی بنائی جائے، جعلی ادویات کے کاروبار میں ملوث لوگوں کی اصل جگہ جیل ہے،وفاقی وزیرداخلہ محسن نقوی

منگل 8 جولائی 2025 11:10

کراچی (اُردو پوائنٹ اخبارتازہ ترین - اے پی پی۔ 08 جولائی2025ء) وفاقی وزیرداخلہ محسن نقوی نے کہا ہے کہ بیرون ملک سے ڈی پورٹ ہوکر آنے والے بھکاریوں کی گرفتاری یقینی بنائی جائے،مفرور ایجنٹس کو دیگر صوبوں کے تعاون سے گرفتار کیا جائے، جعلی ادویات کے کاروبار میں ملوث لوگوں کی اصل جگہ جیل ہے۔ان خیالات کا اظہار انہوں نے منگل کو ایف آئی اے کراچی زون کے اجلاس کی صدارت کرتے ہوئے کیاجس میں ایڈیشنل ڈائریکٹر جنرل ایف آئی اے سائوتھ مجاہد اکبر خان، ڈائریکٹر ایف آئی اے کراچی زون نعمان صدیق، ڈپٹی ڈائریکٹر اینٹی منی لانڈرنگ،ڈپٹی ڈائریکٹر امیگریشن،ڈپٹی ڈائریکٹر اینٹی کرپشن ، تمام اسسٹنٹ ڈائریکٹرز اور ایف آئی اے سائوتھ کے حکام بھی شریک تھے۔

ڈائریکٹر کراچی زون نعمان صدیق نے وزیر داخلہ کو بریفنگ دی اور انہیں ایف آئی اے کراچی زون کی کارکردگی اور ایشوز سے آگاہ کیا۔

(جاری ہے)

وزیر داخلہ نے حوالہ ہنڈی مافیا کےخلاف موثر کریک ڈاؤن کا حکم دیتے ہوئے کہا کہ اس میں ملوث بڑے بڑے لوگوں پر ہاتھ ڈالا جائے،کسی کا دباؤ قبول کئے بغیر مافیا کے خلاف بلا امتیاز کارروائی کی جائے۔ محسن نقوی نے بھکاریوں کو بیرون ملک بھجوانے والے ایجنٹ مافیا کی سرکوبی کا حکم دیتے ہوئے کہا کہ بھکاری مافیا پاکستان کے امیج کو خراب کر رہا ہے، ایجنٹس کے خلاف بلاامتیاز ایکشن نظر آنا چاہیے،مفرور ایجنٹس کو دیگر صوبوں کے تعاون سے گرفتار کیا جائے ۔

ان کا کہنا تھا کہ جعلی ادویات کا کاروبار کسی صورت برداشت نہیں کیا جائے گا ، اس مکروہ دھندے میں ملوث لوگوں سے آہنی ہاتھوں سے نمٹا جائے،جعلی ادویات کے کاروبار میں ملوث لوگوں کی اصل جگہ جیل ہے،انہوں نے نان کسٹم مصنوعات کے خلاف بھرپور کارروائی کی ہدایت بھی کی۔وزیرداخلہ نے 5 ہزار سے زائد ڈالر بیرون ملک لے کر جانے والے مسافروں کے خلاف سخت ایکشن دیتے ہوئے ایف آئی اے کو حکام کوہدایت کی ہے کہ ایسے افراد کے خلاف قانون کے مطابق بھرپور کارروائی کی جائے۔\932