بھارتی فوجیوں کی بربریت،برہان وانی کی شہادت سے اب تک2ہزا62 کشمیری شہیدہوچکے،رپورٹ

منگل 8 جولائی 2025 11:56

سرینگر (اُردو پوائنٹ اخبارتازہ ترین - اے پی پی۔ 08 جولائی2025ء) بھارت کے غیر قانونی زیر تسلط جموں وکشمیر میں بھارتی فوجیوں نے8جولائی 2016 میں معروف نوجوان رہنما برہان مظفر وانی کے ماورائے عدالت قتل کے بعد سے اب تک 2ہزار62کشمیریوں کو شہید کیا ہے ،ان میں سے 337کشمیریوں کو جعلی مقابلوں یا دوران حراست شہید کیاگیا۔کشمیر میڈیا سروس کے ریسرچ سکیشن کی طرف سے آج برہان وانی کے نویں یوم شہادت کے موقع پر جاری رپورٹ میں کہا گیا ہے کہ ان شہادتوں کے نتیجے میں166خواتین بیوہ اور413بچے یتیم ہوئے۔

رپورٹ کے مطابق اس عرصے کے دورا ن حریت رہنمائوں ، نوجوانوں ، صحافیوں ، علمائے کرام اور انسانی حقوق کے کارکنوں سمیت 41ہزار242کشمیریوں کو گرفتارکیاگیا۔ بھارتی فوجیوں، پیرا ملٹری فورسز اور پولیس اہلکاروں کی طرف سے پرامن مظاہرین پر گولیوں، پیلٹ اور آنسو گیس کے گولوں سمیت طاقت کے وحشیانہ استعمال سے کم سے کم 30ہزار112کشمیری زخمی ہوئے ۔

(جاری ہے)

ان فوجیوں نے برہان وانی کو 2016 میں آج ہی کے دن ضلع اسلام آباد کے علاقے کوکر ناگ میں دو ساتھیوں کے ہمراہ ایک جعلی مقابلے میں شہید کردیاتھا، ان کے ماورائے عدالت قتل پر مقبوضہ علاقے میں کئی ماہ تک زبردست عوامی احتجاجی تحریک چلی تھی جس دوران بھارتی فوجیوں نے فائرنگ ، پیلٹ گنز اور آنسو گیس کا بے دریغ استعمال کرتے ہوئے 150سے زائد کشمیریوں کو شہید کیا ۔اقوام متحدہ، ایمنسٹی انٹرنیشنل اور ہیومن رائٹس واچ سمیت انسانی حقوق کی متعدد بین الاقوامی تنظیموں نے مقبوضہ علاقے میں طاقت کے وحشیانہ استعمال، مواصلاتی بلیک آئوٹ اور بھارتی قابض فوج کومقبوضہ کشمیرمیں انسانی حقو ق کی پامالیوں پر حاصل استثنیٰ پر تشویش ظاہر کی ہے۔