عبدالستار ایدھی کی زندگی سکھاتی ہے اگر جذبہ صادق ہوتو ایک فرد بھی انسانی خدمت کر سکتا ہے‘ مریم نواز شریف

عبدالستار ایدھی جیسے لوگ انسانیت کی معراج ،معاشرے کی خوبصورتی ، انسانوں کی خدمت کرنے والے کا شمار اللہ تعالی کے پسندید ہ بندوں میں ہوتا ہے عبدالستار ایدھی کو سلام پیش کرتی ہوں، عبدالستار ایدھی کو 8ویں برسی پرخراج تحسین

منگل 8 جولائی 2025 20:50

لاہور(اُردو پوائنٹ اخبارتازہ ترین - این این آئی۔ 08 جولائی2025ء)وزیراعلیٰ پنجاب مریم نواز شریف نے کہا ہے کہ عبدالستار ایدھی کو سلام پیش کرتی ہوں ۔ عبدالستار ایدھی کی زندگی سکھاتی ہے اگر جذبہ صادق ہو توایک فرد بھی انسانی خدمت کر سکتا ہے۔ وزیراعلیٰ مریم نوازشریف نے عبدالستار ایدھی کو 8 ویں برسی پرخراج تحسین پیش کیا۔ وزیراعلیٰ مریم نواز شریف نے کہا کہ عبدالستار ایدھی پاکستان کا فخر ہیں،ان کا نام تا قیامت زندہ رہے گا۔

عبدالستار ایدھی جیسے لوگ انسانیت کی معراج اور معاشرے کی خوبصورتی ہیں ۔ بر س ہا برس لالچ اور طمع کے بغیر انسانیت کی خدمت عبدالستار ایدھی کی بے مثال انفرادیت ہے۔ وزیراعلیٰ مریم نواز شریف نے کہا کہ عبدالستار ایدھی کی شخصیت ہر انسان کے لئے قابل تقلید ہے۔

(جاری ہے)

عبدالستار ایدھی کا مقصد فلاح انسانیت تھا، ان کے مشن کو جاری رہنا چاہیے۔ دنیا بھر میں عبدالستار ایدھی کا نام عزت و احترام کی علامت بن چکاہے۔

وزیراعلیٰ مریم نواز شریف نے کہا کہ انسانوں کی خدمت کرنے والے کا شمار اللہ تعالی کے پسندید ہ بندوں میں ہوتا ہے ۔ عبدالستار ایدھی کی روشن شمع سے آج لاکھوں لوگوں کی زندگیاں منور ہو رہی ہیں ۔ عبدالستار ایدھی کی زندگی سماجی خدمتگاروں کے لئے مشعل راہ ہے۔ پنجاب میں انسانیت کی خدمت کے لئے ہمت کارڈ،راشن کارڈ اوردھی رانی پروگرام جیسے پراجیکٹس لانچ کئے ہیں ۔