یوم شہدائے کشمیر،کل جماعتی حریت کانفرنس نے 13 جولائی کو ہڑتال کی کال دےدی

جمعرات 10 جولائی 2025 11:30

سری نگر (اُردو پوائنٹ اخبارتازہ ترین - اے پی پی۔ 10 جولائی2025ء) بھارت کے زیر قبضہ جموں وکشمیر میں کل جماعتی حریت کانفرنس نے 13 جولائی کو” یوم شہدائے کشمیر “کے موقع پر علاقے میں مکمل ہڑتال کی کال دی ہے۔کشمیر میڈیا سروس کے مطابق ڈوگرہ مہاراجہ ہری سنگھ کے فوجیوں نے 13 جولائی1931 کو 22 کشمیریوں کو فائرنگ کر کے شہید کر دیا تھا۔ شہید ہونے والے یہ افراد ان ہزاروں لوگوں میں شامل تھے جو عبدالقدیر نامی ایک شخص کے خلاف مقدمے کی سماعت کے موقع پرسرینگر سینٹرل جیل کے باہر اکھٹے ہوئے تھے جس نے کشمیری عوام کو ڈوگرہ حکمرانی کے خلاف اٹھ کھڑے ہونے کا کہا تھا۔

نماز ظہر کے وقت ایک کشمیری نوجوان نے جب اذان دینا شرو ع کی تو مہاراجہ کے فوجیوں نے اسے فائرنگ کر کے شہید کر دیا۔اس کے بعد ایک اور شخص اذان پوری کرنے کےلئے کھڑا ہوا تو اسے بھی شہید کردیا گیا۔

(جاری ہے)

یوں اذان مکمل ہونے تک 22کشمیریوں نے اپنی جانیں قربان کیں۔کل جماعتی حریت کانفرنس کے ترجمان ایڈووکیٹ عبدالرشید منہا س نے سرینگر میں جاری بیان میں یوم شہدائے کشمیر پرنقشبند صاحب شہدا قبرستان سرینگر کی طرف مارچ کی بھی کال دی ہے۔

انہوں نے کہا کہ 13جولائی 1931کے شہداکو خراج عقیدت پیش کرنے کا بہترین طریقہ یہ ہے کہ کشمیری بھارتی تسلط سے آزادی تک اپنی جدوجہد عزم و ہمت سے جاری رکھیں۔ انہوں نے لوگوں پر زور دیا کہ وہ 13 جولائی کو مکمل ہڑتال اور شہدا قبرستان کی طرف بھر پور مارچ کریں تاکہ بھارت کو یہ واضح پیغام دیا جاسکے کہ کشمیری اس کے قبضے کے خاتمے تک ہرگز چین سے نہیں بیٹھیں گے۔

ترجمان نے آئمہ اور خطبا سے بھی اپیل کی کہ وہ لوگوں کو ہندوتوا کی جارحیت سے آگاہ کریں۔ترجمان نے کہا کہ بی جے پی کی بھارتی حکومت اور اس کے مسلط کردہ لیفٹیننٹ گورنرنے 5 اگست 2019 کے غیر قانونی اقدام کے بعد کشمیریوں پر مظالم تیز کر دیئے ، ان کے تمام بنیادی حقوق چھین لیے اور انہیں شناخت سے محروم کر دیا۔انہوں نے کہا کہ آرٹیکل 370اور 35اے کی منسوخی کا بنیادی مقصد علاقے میں مسلمانوں کی اکثریت کو اقلیت میں بدلنا ہے اور اس مذموم منصوبے کی تکمیل کے لئے اب تک لاکھوں بھارتی ہندوئوں کو کشمیر کے ڈومیسائل سرٹیفکیٹس دیئے گئے ہیں۔

انہوں نے کہا کہ کشمیر ی عوام بھارت کی تمام سازشوں اور چالوں کو ناکام بنانے کے لئے پرعزم ہیں اور وہ حق خود ارادیت کے حصول تک اپنی جد وجہد جاری رکھیں گے۔