حکومت کی جانب سے میڈیا کو 100 ارب روپے کی ادائیگی کا انکشاف

اسلام آباد ( اُردو پوائنٹ اخبارتازہ ترین۔ 10 جولائی 2025ء ) وفاقی وزیر اطلاعات عطا اللہ تارڑ کا کہنا ہے کہ وفاقی حکومت نے میڈیا کو 100 ارب روپے کی ادائیگی کی ہے، ادائیگیوں اور اشتہارات کے حجم میں پرنٹ میڈیا کا حصہ بڑھانے کی کوشش کی جارہی ہے، وفاقی حکومت وزیر اعظم شہباز شریف کی طرف سے اخباری اشتہارات کے نرخوں میں اضافہ پر جلد ہی عملدرآمد کرے گی کیونکہ یہ حکومت ایک متحرک پرنٹ میڈیا کی ترقی کو جعلی خبروں کے تدارک کیلئے ضروری سمجھتی ہے۔

دنیا نیوز کے مطابق اے پی این ایس ایگزیکٹواراکین کے اعزاز میں دیئے گئے عشائیہ سے خطاب کرتے ہوئے انہوں نے کہا کہ اخباری صنعت کو در پیش ادائیگیوں کے مسائل کو حل کیا جارہا ہے، وزارت اطلاعات اس امر کی بھر پور کوشش کرے گی کہ تمام واجبات با قاعدگی سے ادا ہوں اور کوئی بھی ادائیگی التواء کا شکار نہ ہو، تمام فریقین پر مشتمل ایک کمیٹی قائم کی جائے گی جو سنٹرل میڈیا لسٹ سے ڈمی اخبارات کو خارج کرنے پر غور کرے گی، اس عمل سے باقاعدہ شائع ہونے والے اخبارات کے مالی حالات بہتر ہوں گے، تاہم پرنٹ میڈیا کو در پیش مشکلات کا مقابلہ کرنے کیلئے اخبارات کو جدید طریقے اختیار کرنا ہوں گے۔

(جاری ہے)

قبل ازیں وزیر اطلاعات کو اے پی این ایس کے صدر سینیٹر سرمد علی اور مجلس عاملہ کے اراکین نے اخباری صنعت کو در پیش مسائل سے آگاہ کیا اور بتایا کہ وزیر اعظم نے اگست 2023ء میں سرکاری اشتہارات کے نرخوں میں اضافے کا اعلان کیا تھا لیکن اس فیصلہ پر یقین دہانیوں کے باوجود ابھی تک عمل درآمد نہیں ہو سکا، اخبارات واجبات کی عدم ادائیگی کے باعث شدید مالی مشکلات کا شکار ہیں کیوں کہ حکومت کی طرف سے کی جانے والی ادائیگیوں میں بڑا حصہ الیکٹرانک میڈیا کو جاتا ہے اور اخبارات کو 20 فیصد سے بھی کم حصہ ملتا ہے۔

بتایا گیا ہے کہ سیکرٹری اطلاعات امبرین جان، پی آئی اومبشر حسن اور وزارت کے دیگر افسر عشائیہ میں شریک تھے جبکہ اے پی این ایس کی نمائندگی کیلئے سیکرٹری جنرل محمد اطہر قاضی سیکرٹری فنانس نوید کا شف اور ایگز یکٹوکمیٹی کے دیگر اراکین شامل تھے، آل پاکستان نیوز پیپرسوسائٹی کی ایگزیکٹوکمیٹی کا اجلاس گزشتہ روز اسلام آباد میں ہوا جس کی صدارت سینیٹر سرمد علی نے کی ، اے پی این ایس کے سیکرٹری جنرل محمد اطہر قاضی نے اجلاس کے فیصلوں کا اعلان کرتے ہوئے بتایا کہ اراکین نے وفاقی اور صوبائی حکومتوں پر زور دیا ہے کہ طویل عرصہ سے زیر التوا واجبات کی جلد ادائیگی کی جائے تا کہ اخباری صنعت در پیش مالی بحران کا مقابلہ کرسکے۔

معلوم ہوا ہے کہ اراکین نے ڈی جی پی آر کی طرف سے پچھلی حکومتوں کے ادوار سے متعلق واجبات کی عدم ادائیگی پر تشویش کا اظہار کیا، اجلاس نے یہ فیصلہ بھی کیا کہ اے پی این ایس کے صدر کی قیادت میں ایک وفد صوبہ سندھ کے سیکرٹری اطلاعات سے ملاقات کرکے طویل عرصہ سے واجب الادا نان بلڈ اشتہارات کی جلد ادائیگی کا مطالبہ کرے گا، ایگز یکٹوکمیٹی نے ایڈور ٹائزنگ کمیٹی کی رپورٹ منظور کرتے ہوئے میسرز برانڈ اسپیکٹرم (پرائیویٹ) لمیٹڈ لا ہور کی عبوری ایکریڈیٹیشن کی منظوری دی۔