چین نے دریائے برہما پترا پر ڈیم کی تعمیر شروع کردی

چین کے دریائے برہما پترا ڈیم منصوبے نے بھارت میں خوف کی فضا پیدا کردی،رپورٹ

جمعہ 11 جولائی 2025 17:37

بیجنگ (اُردو پوائنٹ اخبارتازہ ترین - این این آئی۔ 11 جولائی2025ء)چین نے دریائے برہما پترا پر ایک سو سینتیس ارب ڈالر کی لاگت سے ڈیم کی تعمیر شروع کردی۔ چین نے تبت کے دریائے یارلنگ سانگپو میں دنیا کا سب سے بڑا پن بجلی منصوبہ شروع کردیا، جس سے 60 ہزار میگاواٹ بجلی پیدا ہوسکے گی۔

(جاری ہے)

چین کے دریائے برہما پترا ڈیم منصوبے نے بھارت میں خوف کی فضا پیدا کردی، بھارتی ریاست اروناچل پردیش کے وزیراعلی پیما کھنڈو نے چین کے زیر تعمیر میگا ہائیڈرو پاور ڈیم کو بھارت کے لیے پانی کا ایٹم بم قرار دیتے ہوئے کہا کہ اگر چین نے اچانک پانی چھوڑ دیا تو آسام اور اروناچل کے قبائلی علاقوں میں تباہی مچ جائے گئی۔

اروناچل کے وزیراعلی نے کہا کہ چین نے پانی کی بین الاقوامی تقسیم کے معاہدے پر دستخط نہیں کئے اور یہی بھارت کے لیے سب سے بڑا مسئلہ ہے، انہوں خدشہ ظاہر کیا ہے کہ ڈیم کی وجہ سے براہما پترا اور سیانگ دریائوں کا پانی کافی حد تک خشک ہو سکتا ہے۔