کنٹرول لائن کے دونوں جانب ،پاکستان اور دنیا بھر میں مقیم کشمیریوں نے یوم شہدائے کشمیرمنایا

آزاد کشمیر، پاکستان اور دنیا کے تمام بڑے دارالحکومتوں میں ریلیاں، سیمینار اور کانفرنسز کا انعقاد کیا گیا

اتوار 13 جولائی 2025 13:50

اسلام آباد(اُردو پوائنٹ اخبارتازہ ترین - این این آئی۔ 13 جولائی2025ء)کنٹرول لائن کے دونوں جانب ،پاکستان اور دنیا بھر میں مقیم کشمیریوں نے 13جولائی 1931کے شہداء اور دیگر تمام کشمیری شہداء کو خراج عقیدت پیش کرنے کے لیے ’’یوم شہدائے کشمیر‘‘منایا۔کشمیرمیڈیاسروس کے مطابق کل جماعتی حریت کانفرنس نے 13جولائی کو یوم شہدائے کشمیر کے موقع پر بھارت کے زیر قبضہ جموں و کشمیر میں ہڑتال اور سرینگر کے نقشبند صاحب میں وا قع مزارشہداء کی طرف مارچ کی کال دے رکھی تھی جہاں 13جولائی کے شہداء مدفون ہیں۔

حریت کانفرنس نے سرینگر میںجاری ایک بیان میں کشمیریوں پر زور دیا ہے کہ وہ ہڑتال اور مارچ کو بھر پور طریقے سے کامیاب بنائیں تاکہ بھارت کے ساتھ ساتھ عالمی برادری کو یہ واضح پیغام دیا جاسکے کہ کشمیری بھارتی تسلط سے آزادی تک اپنے شہداء کے عظیم مشن کو جاری رکھیں گے۔

(جاری ہے)

بیان میں کہا گیاکہ مقبوضہ جموں وکشمیر میں اس وقت جاری جدوجہد اسی تحریک کا تسلسل ہے جو 13 جولائی 1931 کے عظیم شہداء نے شروع کی تھی، کشمیریوں کی یہ جدوجہد شہداء کے پاکیزہ خون سے پروان چڑھی ہے اور دنیا کی کوئی طاقت اسے شکست نہیں دے سکتی۔

شہداء کو خراج عقیدت پیش کرنے کے لیے آزاد کشمیر، پاکستان اور دنیا کے تمام بڑے دارالحکومتوں میں ریلیاں، سیمینار اور کانفرنسز کا انعقاد کیا گیا۔یاد رہے کہ ڈوگرہ مہاراجہ ہری سنگھ کے فوجیوں نے 1931میں آج ہی کے روز 22 کشمیریوں کو گولیاں مار کر شہید کر دیا تھا۔ شہید ہونے والے یہ افراد ان ہزاروں لوگوں میں شامل تھے جو عبدالقدیر نامی ایک شخص کے خلاف مقدمے کی سماعت کے موقع پرسرینگر سینٹرل جیل کے باہر اکھٹے ہوئے تھے جس نے کشمیری عوام کو ڈوگرہ حکمرانی کے خلاف اٹھ کھڑے ہونے کے لئے کہا تھا۔

نماز ظہر کے وقت ایک کشمیری نوجوان نے جب اذان دینا شرو ع کی تو مہاراجہ کے فوجیوں نے اسے گولی مارکر شہید کر دیا۔اس کے بعد ایک اور شخص اذان پوری کرنے کیلئے کھڑا ہوا تو اسے بھی شہید کردیا گیا۔ یوں اذان مکمل ہونے تک 22کشمیریوں نے اپنی جانیں قربان کیں۔کنٹرول لائن کے دونوں جانب اور دنیا بھر میں مقیم کشمیر ی ان عظیم شہداکی یاد میں ہر برس 13جولائی کو’’یوم شہدائے کشمیر‘‘کے طور پر مناتے ہیں۔