کراچی میں قلندرز اور وزیر اعظم یوتھ پروگرام کے ٹیلنٹ ہنٹ ٹرائلز مکمل، لڑکوں اور لڑکیوں کی 15، 15 رکنی ٹیموں کا اعلان

کراچی (اُردو پوائنٹ اخبارتازہ ترین - این این آئی۔ 13 جولائی2025ء)لاہور قلندرز اور وزیر اعظم یوتھ پروگرام کے اشتراک سے منعقد ہونے والے دو روزہ ٹیلنٹ ہنٹ کرکٹ ٹرائلز کراچی میں کامیابی کے ساتھ مکمل ہوگئے، جس کے بعد لڑکوں اور لڑکیوں کی 15، 15 رکنی منتخب ٹیموں کا اعلان کردیا گیا۔این ای ڈی یونیورسٹی کراچی میں منعقدہ ان ٹرائلز میں ہزاروں نوجوان کرکٹرز نے شرکت کی، جنہوں نے لاہور قلندرز کے سسٹم کا حصہ بننے کے لیے جوش و خروش سے حصہ لیا۔

ٹرائلز کی تکمیل پر لاہور قلندرز کے سی ای او عاطف رانا، کوچز مرینہ اقبال اور ریاض آفریدی نے ایک پریس کانفرنس میں منتخب کھلاڑیوں کے ناموں کا اعلان کیا۔عاطف رانا نے کراچی ٹرائلز کے بارے میں گفتگو کرتے ہوئے کہا کہ ہزاروں نوجوانوں کی شرکت اس بات کا ثبوت ہے کہ پاکستان کے نوجوان لاہور قلندرز کے ویڑن پر اعتماد کرتے ہیں۔

(جاری ہے)

انہوںنے کہاکہ ہم نے کھلاڑیوں کی ترقی کا سفر 10 سال قبل شروع کیا تھا، اور آج کئی نمایاں کھلاڑی اسی پروگرام سے منظرعام پر آئے ہیں،وزیر اعظم پاکستان کی جانب سے ہمارے اس مشن پر اعتماد نے ہمیں اسے قومی سطح پر وسعت دینے کا حوصلہ دیا۔

انہوں نے بتایا کہ کراچی میں لگ بھگ 15 ہزار نوجوان لڑکوں اور لڑکیوں نے ٹرائلز دیے، جس کے بعد اب اگلا مرحلہ حیدرآباد میں منعقد ہوگا اور سندھ بھر سے مجموعی طور پر پانچ ٹیمیں تشکیل دی جائیں گی۔عاطف رانا نے بتایا کہ اس منصوبے کے تحت ہر صوبے، آزاد کشمیر اور گلگت بلتستان سے پانچ پانچ ٹیمیں بنائی جائیں گی جو علاقائی ٹورنامنٹس میں حصہ لیں گی۔

ان ٹورنامنٹس میں بہترین کارکردگی دکھانے والے کھلاڑیوں کو نیشنل ٹورنامنٹ میں موقع دیا جائے گا، اور پھر اس نیشنل ایونٹ کے ٹاپ پلیئرز کو لاہور قلندرز ہائی پرفارمنس سینٹر میں تربیت دی جائے گی۔کوچز مرینہ اقبال اور ریاض آفریدی نے کراچی میں ہونے والے ٹرائلز میں شریک کھلاڑیوں کے جوش، ٹیلنٹ اور جذبے کو سراہا اور اتنے بڑے پیمانے پر ہونے والے اس پروگرام کو پاکستانی کرکٹ کے لیے ایک نیا در کھولنے والا قدم قرار دیا۔

کراچی سے منتخب ہونے والی لڑکیوں کی ٹیم: یسری عامر، علیزے صابر، عاریجہ حسیب، آمنہ زاہد، تسکین فاطمہ، کائنات ایمان، عنیزہ عارف، سیدہ بتول فاطمہ، شبنم حیات، معصومہ جعفری، عبیرہ ریاض، فائقہ طارق، اریج عامر، مریم احمد، عشا نعیم شامل ہیں۔کراچی سے منتخب ہونے والی لڑکوں کی ٹیم: ارمان شہزاد، عبداللہ جاوید، محمد صدیق، عمر فاروق، زین انور، حمزہ ملک، علی شعیب، محمد شاہیر، محمد فرمان، نوید اللہ، سید زین، عبدالروف، معاذ شاہ آفریدی، عبدالجلیل، سید ریحان شاہ شامل ہیں نومنتخب لڑکوں اور لڑکیوں کے کھلاڑیوں نے وزیراعظم شہباز شریف اور چیئرمین وزیراعظم یوتھ پروگرام رانا مشہود احمد خان کا تہہ دل سے شکریہ ادا کیا کہ انہوں نے لاہور قلندرز کے ساتھ اس تاریخی قومی سطح کے ٹیلنٹ ہنٹ میں شراکت داری کی۔

انہوں نے اس بات کا اعتراف کیا کہ یہ بصیرت افروز اقدام ملک کے کونے کونے سے اصل کرکٹ ٹیلنٹ کو سامنے لانے میں کلیدی کردار ادا کرے گا۔منتخب ہونے والے نوجوان کھلاڑیوں نے لاہور قلندرز کے سی ای او عاطف رانا اور سی او او ثمین رانا کا شکریہ ادا کرتے ہوئے عزم ظاہر کیا۔