پنجاب کی نسبت خیبرپختونخوا ہ میں کرپشن زیادہ ہے، گیلپ سروے میں خیبر پختونخوا ہ کے عوام کا صوبے میں گورننس اور سہولتوں کی عدم دستیابی پر ناراضگی کا اظہار

عوام اور پی ٹی آئی ووٹرز بھی اپنی حکومت سے غیرمطمئن،73 فیصد نے سرکاری نوکریاں تعلقات پر دیئے جانے کا الزام لگا دیا، 66 فیصد ووٹرز نے ایم پی ایز پر وعدہ خلافی کا الزام لگایا، صوبے میں خاطر خواہ ترقی نہیں ہوئی، رپورٹ

فیصل علوی پیر 14 جولائی 2025 14:21

پشاور(اردوپوائنٹ اخبار تازہ ترین۔14جولائی 2025)پنجاب کی نسبت خیبرپختونخوا ہ میں کرپشن زیادہ ہے، گیلپ سروے میں خیبر پختونخوا ہ کے عوام کا صوبے میں گورننس، معیشت اور سہولتوں کی عدم دستیابی پر شدید ناراضی کا اظہارکر دیا، تازہ ترین گیلپ سروے میں یہ بات سامنے آئی ہے کہ خیبر پختونخوا ہ میں عوام اور پی ٹی آئی ووٹرز بھی اپنی حکومت سے غیرمطمئن ہیں۔

گیلپ پاکستان نے خیبرپختونخواہ میں 3 ہزار افراد سے انٹرویو کئے یہ رپورٹ گلوبل پاکستان کے تعاون سے تیار کی گئی۔ سروے میں نصف تعداد نے کہا کہ صوبے میں خاطر خواہ ترقی نہیں ہوئی۔ 40 فیصد شہری کہتے ہیں پنجاب کی نسبت خیبرپختونخوا ہ میں کرپشن زیادہ ہے۔ 73 فیصد نے سرکاری نوکریاں تعلقات پر دیئے جانے کا الزام لگا دیا۔ 59 فیصد شہریوں نے بے روزگاری میں اضافے کی نشان دہی کی۔

(جاری ہے)

گیلپ سروے کے مطابق دیہی علاقوں میں صحت کی سہولتیں نہ ہونے کے برابر ہیں۔ 52 فیصد شہری سمجھتے ہیں کہ ترقیاتی فنڈز کرپشن کی نذر ہو گئے۔ سروے کے مطابق 66 فیصد ووٹرز نے ایم پی ایز پر وعدہ خلافی کا الزام لگایا جبکہ 60 فیصد شہریوں کے مطابق وزیراعلیٰ علی امین گنڈاپور حکومت احتجاج میں وقت ضائع کر رہی ہے۔ سروے کے دوران55 فیصد شہریوں نے صوبے کے انفرااسٹرکچر کو انتہائی ناقص قرار دیا۔

49 فیصد پی ٹی آئی ووٹرز بھی خیبرپختونخواہ حکومت سے غیر مطمئن ہیں۔ سیکیورٹی پر ملا جلا رد عمل دیکھنے میں آیا۔ 57 فیصد اب بھی دہشتگردی سے خوف زدہ ہیں جبکہ 85 فیصد شہری افغان شہریوں کی واپسی کے فیصلے پر مطمئن ہیں۔ ان کا کہنا ہے کہ افغان شہریوں کی واپسی سے امن و امان بہتر ہوگا، 48 فیصد کے مطابق روزگار کے مواقع بڑھیں گے۔صوبے کی 66 فیصد آبادی گیس سے محروم جبکہ40 فیصدکو بجلی کی قلت کا سامنا ہے۔ نوجوان سہولتوں سے محروم ہیں۔ 77 فیصد کو پارکس، 81 فیصد کو لائبریریز دستیاب نہیں ہیں۔ گیلپ سروے میں خیبر پختونخوا ہ کے عوام نے صوبے میں سہولتوں کی عدم دستیابی پربھی ناراضگی کا اظہار کیا ہے۔