پاکستان اور انڈونیشیا کے درمیان مشترکہ ثقافت، مذہب اور تاریخی رشتوں پر مبنی دیرینہ دوستانہ تعلقات ہیں. شہبازشریف

دونوں ممالک بین الاقوامی فورمز پر ایک دوسرے کی حمایت کرتے ہیں،باہمی فائدہ مند منصوبوں میں سرمایہ کاری کےلئے انڈونیشیا کے ساتھ تعاون کو مزید فروغ دینے کی ضرورت ہے. وزیراعظم سے انڈونیشیا کے وزیردفاع کی ملاقات

میاں محمد ندیم منگل 15 جولائی 2025 15:52

پاکستان اور انڈونیشیا کے درمیان مشترکہ ثقافت، مذہب اور تاریخی رشتوں ..

اسلام آباد(اردوپوائنٹ اخبارتازہ ترین-انٹرنیشنل پریس ایجنسی۔15 جولائی ۔2025 )وزیراعظم شہباز شریف نے کہا ہے کہ پاکستان اور انڈونیشیا کے درمیان مشترکہ ثقافت، مذہب اور تاریخی رشتوں پر مبنی دیرینہ دوستانہ تعلقات ہیں اور دونوں ممالک بین الاقوامی فورمز پر ایک دوسرے کی حمایت کرتے ہیں. وزیراعظم شہباز شریف سے انڈونیشیا کے وزیر دفاع لیفٹیننٹ جنرل(ر) سیافری سمسودین نے ملاقات کی، جس میں مختلف شعبوں میں تعاون کے فروغ کے عزم کا اعادہ کیا گیا اس موقع پر شہباز شریف نے انڈونیشیا کے صدر پرابووو سوبیانٹوو کے ساتھ قاہرہ میں جی 8 سربراہی اجلاس کے موقع پر اپنی خوشگوار ملاقات کو یاد کرتے ہوئے ان کے لیے نیک خواہشات کا اظہار کیا.

(جاری ہے)

ملاقات میں پاکستان اور انڈونیشیا کے درمیان گہرے تاریخی، برادرانہ اور دوستانہ دوطرفہ تعلقات پر بھی گفتگو کی گئی وزیراعظم نے کہا کہ پاکستان اور انڈونیشیا کے درمیان مشترکہ ثقافت، مذہب اور تاریخی رشتوں پر مبنی دیرینہ دوستانہ تعلقات ہیں اور دونوں ممالک بین الاقوامی فورمز پر ایک دوسرے کی حمایت کرتے ہیں. وزیراعظم نے پاکستان کے انڈونیشیا کے ساتھ اقتصادی و تزویراتی تعلقات اور تجارت، دفاع اور دفاعی پیداوار کے شعبوں سمیت تمام شعبوں میں دو طرفہ تعاون کو مزید فروغ دینے کے عزم کا اعادہ کیا ملاقات میں دونوں راہنماﺅ ں نے کثیر الجہتی دوطرفہ تعاون کو بڑھانے کی اہمیت پر زور دیا.

وزیر اعظم شہباز شریف نے باہمی فائدہ مند منصوبوں میں سرمایہ کاری کے لیے انڈونیشیا کے ساتھ تعاون کو مزید فروغ دینے پر زور دیا وزیر اعظم نے پاکستان اور انڈونیشیا کے مابین دفاعی تعاون کے معاہدے کے تحت جاری اقدامات کا بھی جائزہ لیا اور دونوں راہنماﺅں نے اس معاہدے کے نفاذ کو تیز کرنے پر اتفاق کیا. لیفٹیننٹ جنرل (ر )سیفری سمسودین نے انڈونیشیا کے صدر پرابوو سوبیانٹو کی جانب سے وزیراعظم محمد شہباز شریف اور پاکستان کے عوام کے لیے نیک خواہشات کا اظہار کیا انہوں نے انڈونیشیا کی پاکستان کے ساتھ دفاعی تعلقات کو مزید مضبوط بنانے اور مختلف شعبوں خصوصا دفاعی پیداوار میں تعاون کے مزید مواقع تلاش کرنے کی خواہش کا اعادہ کیا.