Live Updates

وزیر اعلی خیبر پختونخوا کی 90دن کی تحریک ناکام ہوتی نظر آرہی ہے، معاملات توڑ پھوڑ یا سڑکوں پر حل نہیں ہوتے ،گورنر پنجاب

منگل 15 جولائی 2025 20:30

لاہور (اُردو پوائنٹ اخبارتازہ ترین - اے پی پی۔ 15 جولائی2025ء) گورنر پنجاب سردار سلیم حیدر خان نے کہا ہے کہ وزیر اعلی خیبر پختونخوا کی 90دن کی تحریک ناکام ہوتی نظر آرہی ہے، معاملات توڑ پھوڑ یا سڑکوں پر حل نہیں ہوتے، تحریک کی بجائے مذاکرات کی طرف آنا چاہئے، ملکی کی معیشت کو ٹھیک کرنے کے لئے سب کو مل کر چلنا ہے۔ ان خیالات کا اظہار انہوں نے منگل کے روز یہاں مقامی ہوٹل لاہور میں منعقدہ تقریب کے بعد میڈیا سے گفتگو کرتے ہوئے کیا۔

گورنرپنجاب نے کہا کہ وزیراعلی کے پی کے علی امین گنڈا پور کو اپنے صوبے پر توجہ دینے کی ضرورت ہے۔ انہوں نے کہا کہ حالیہ دنوں سیلاب میں پورا خاندان بہہ گیا مگر کے پی کے حکومت کچھ نہ کر سکی۔انہوں نے کہا کہ یہ بڑے افسوس کی بات ہے کہ وہاں پر موجود ریسکیو ٹیم 1122کے پاس سیلاب زدگان کو بچانے کیلئے سوائے رسی کے کچھ نہ تھا۔

(جاری ہے)

انہوں نے کہا کہ ملک کو اس وقت دہشت گردی سمیت مختلف چیلنجز کا سامنا ہے،موجودہ صوتحال میں وزیر اعلی کے پی کے پر اپنے صوبے میں امن وامان کی بہت بڑی ذمہ داری عائد ہوتی ہے ۔

انہوں نے کہا کہ سیاست اپنی جگہ ، تمام سیاسی جماعتیں اپنی اپنی سیاست ضرورکریں لیکن پہلے ملکی استحکام کو مقدم رکھنے کی ضرورت ہے۔گورنر پنجاب نے کہا کہ دنیا میں بڑے بڑے لیڈر گزرے ہیں ، انہوں نے بھی جو کامیابی حاصل کی ہے وہ صرف مذاکرات کی میز پر ہی ممکن ہوئی ہیں۔ ایک سوال کے جواب میں گورنر پنجاب نے کہا کہ پیپلزپارٹی پنجاب کی تنظیم نو مکمل ہو چکی ہے اور اس کی سفارشات چئیرمین بلاول بھٹو کو بھجوا دی جائیں گی۔انہوں نے کہا کہ ہماری پوری کوشش ہے کہ اگلے کچھ دنوں میں ان کے نوٹیفکیشن جاری ہو جائیں ۔