علی امین گنڈاپور سیاست چھوڑنے کا ارادہ کرلیں،طلال چوہدری

بانی پی ٹی آئی گولڈ اسمتھ کا اور گولڈ اسمتھ اسرائیل کا اثاثہ ، بیٹوں کو اب یاد آیا کہ ان کا باپ جیل میں ہی ،گفتگو

منگل 15 جولائی 2025 22:15

اسلام آباد(اُردو پوائنٹ اخبارتازہ ترین - این این آئی۔ 15 جولائی2025ء)وزیر مملکت برائے داخلہ طلال چوہدری نے کہا ہے کہ علی امین گنڈاپور سیاست چھوڑنے کا ارادہ کرلیں، شیخ رشید اور فواد چوہدری بھی کہا کرتے تھے اپنا نام بدل لیں گے، بال منڈوالیں گے۔ منگل کو پارلیمنٹ ہاؤس میں نجی ٹی وی سے گفتگو کرتے ہوئے طلال چوہدری نے کہاکہ اس طرح کی ڈیڈ لائن کے بعد پی ٹی آئی والے سیاست چھوڑنے کی تیاری کریں، کسی پریشر یا چڑھائی سے کسی قسم کا ریلیف یا این آراو نہیں ملے گا۔

انہوںنے کہاکہ حکومت اور اداروں کا فوکس اڈیالہ پر نہیں بلکہ پاکستانی معیشت اور دہشتگردی ختم کرنے پر ہے، علی امین اپنی وزارت اعلیٰ کی ڈیڈ لائن آگے بڑھانے کیلئے اس طرح کی بڑھکیں مارتے رہتے ہیں۔ طلال چوہدری نے کہاکہ امید ہے ان میں غیرت ہوگی تو 90دن بعد یہ سیاست چھوڑ دیں گے۔

(جاری ہے)

انہوںنے کہاکہ بانی پی ٹی آئی جب وزیراعظم تھے تو ان کے بیٹے کم ہی ان سے ملنے آتے تھے،بانی پی ٹی آئی کے بیٹوں کو اب یاد آیا کہ ان کا باپ جیل میں ہی گولڈ اسمتھ نے بانی پی ٹی آئی سے رشتہ داری بھی بڑی سوچ سمجھ کر کی تھی، بانی پی ٹی آئی کی جماعت کو ساری فنڈنگ وہاں سے آتی ہے، بنی گالا بے نامی جائیداد بھی وہ دے کر گئی ہیں۔

طلال چوہدری نے کہا کہ بانی پی ٹی آئی گولڈ اسمتھ کا اور گولڈ اسمتھ اسرائیل کا اثاثہ ہے، بلوچستان میں حالیہ دہشتگردی کے پیچھے بھارت کا ہاتھ ہے۔