Live Updates

ریحام خان کی سیاست میں انٹری،پاکستان ریپبلک پارٹی (پی آر پی) کے قیام کا اعلان

بدھ 16 جولائی 2025 21:04

کراچی (اُردو پوائنٹ اخبارتازہ ترین - آن لائن۔ 16 جولائی2025ء)سابق وزیر اعظم عمران خان کی سابقہ اہلیہ اور صحافی ریحام خان نے سیاست کی دنیا میں قدم رکھتے ہوئے نئی سیاسی جماعت پاکستان ریپبلک پارٹی (پی آر پی) کے قیام کا اعلان کر دیا۔کراچی پریس کلب میں پریس کانفرنس کرتے ہوئے جماعت کا نام، منشور اور لوگو عوام کو بتایا، اس موقع پر ریحام خان نے کہا کہ ان کی سیاست کا مقصد عوامی مسائل کو اُجاگر کرنا اور قومی اسمبلی سمیت تمام قانون ساز اداروں میں حقیقی عوامی نمائندگی کو یقینی بنانا ہے۔

ریحام خان نے کہا کہ پاکستان کا ہر شہر، ہر گاؤں میرا حلقہ انتخاب ہے، ہم صرف ایک سیاسی جماعت نہیں، ایک قومی مشن ہیں جو امید، وقار اور عوامی نمائندگی کو بحال کرنے نکلے ہیں۔انہوں نے خواتین، کسانوں اور عام شہریوں کے لیے قانونی اصلاحات کی ضرورت پر زور دیتے ہوئے کہا کہ پاکستان کو ایسی پالیسیاں درکار ہیں جو عوام کی اصل مشکلات کی ترجمانی کریں۔

(جاری ہے)

پریس کانفرنس کے دوران ریحام خان نے حالیہ تاجر برادری کی شٹر ڈاو?ن ہڑتال کا حوالہ دیتے ہوئے حکومت پر تنقید کی اور سوال کیا کہ وزیر خزانہ صرف ہڑتال کے بعد کیوں بات کرتے ہیں پہلے سے مشاورت کیوں نہیں کی جاتی پریس کانفرنس کے بعد سوشل میڈیا پلیٹ فارم ایکس پر جاری پیغام میں انہوں نے لکھا کہ یہ سب آپ کیلیے ہے، ہمارے ورکنگ گروپس میں شامل ہوں، آیے مل کر سر جوڑ کر بیٹھیں اور اپنے مستقبل کی منصوبہ بندی کریں۔