پنجاب بھر میں دفعہ 144نافذ، ڈیموں، دریاؤں، تالابوں اور بارش کے کھڑے پانی میں نہانے پر پابندی عائد

 لاہور(اردوپوائنٹ اخبار تازہ ترین۔17جولائی 2025)بارشوں کی موجودہ صورتحال کے باعث پنجاب میں ڈیموں، دریاؤں، تالابوں اور جھیلوں میں ہر قسم کی تیراکی پر پابندی عائد، دفعہ 144نافذ کر دی گئی، محکمہ داخلہ پنجاب نے صوبے میں دفعہ 144 کے نفاذ کا نوٹیفکیشن جاری کر دیا، صوبے میں دفعہ 144 کے تحت تمام پابندیوں کا اطلاق 30 اگست تک ہو گا، پنجاب حکومت نے صوبے بھر میں موسلا دھار اور طوفانی بارشوں کے باعث ہنگامی صورتحال سے نمٹنے کیلئے رین ایمرجنسی بھی نافذ کی ہے۔

بتایا گیا ہے کہ محکمہ داخلہ کی جانب سے جاری نوٹیفکیشن کے مطابق کردہ ڈیموں، دریاؤں، تالابوں، جھیلوں اور ڈسٹری بیوٹریز میں بلااجازت کشتی رانی پر پابندی عائد کر دی گئی ہے جبکہ گلیوں، سڑکوں یا عوامی مقامات پر بارش کے جمع شدہ پانی میں نہانے پر بھی پابندی ہو گی۔

(جاری ہے)

نوٹیفکیشن کے مطابق ڈیموں، دریاؤں، تالابوں اور جھیلوں میں ہر قسم کی تیراکی پر پابندی عائد کی گئی ہے۔

دوسری جانب وزیراعلیٰ پنجاب مریم نواز کی ہدایت پر صوبے بھر میں طوفانی بارشوں کے باعث پیدا ہونے والی ہنگامی صورتحال سے نمٹنے کیلئے رین ایمرجنسی نافذ کر دی گئی ہے۔ ضلعی انتظامیہ، پولیس، ریسکیو 1122 سمیت دیگر متعلقہ ادارے مکمل طور پر متحرک ہیں جبکہ کشتیوں کے ذریعے سیلاب زدہ علاقوں میں عوام کو ریسکیو کرنے کا عمل بھی جاری ہے۔وزیراعلیٰ پنجاب مریم نواز نے ہسپتالوں کو ہائی الرٹ پر رہنے کی ہدایات دی ہیں اور تمام فیلڈ ہسپتالوں و طبی مشینری کو متاثرہ علاقوں میں فوری طور پر پہنچانے کا حکم دیا ہے۔

انہوں نے پولیس کو گشت بڑھانے اور امدادی کارروائیوں میں ضلعی انتظامیہ کے ساتھ تعاون کی ہدایت بھی جاری کی۔پنجاب کے دیگر شہروں کی طرح لاہور میں مون سون کا سسٹم موجود ہے جب کہ لاہور شہر میں آج بھی کہیں ہلکی ہو کہیں تیز بارش کا امکان ہے۔ شہریوں سے اپیل کی گئی ہے کہ غیر ضروری سفر سے گریز کریں اور بجلی کی تاروں اور کھلے مین ہولز سے دور رہیں۔

لاہور میں کم سے کم درجہ حرارت 27 اور زیادہ سے زیادہ 29 ڈگری تک جانے کے امکان ہیں۔ بارش کے پیش نظر واسا، ایل ڈبلیو ایم سی، بلدیہ عظمی اور محکمہ ہاؤسنگ کے افسران و ملازمین الرٹ ہیں۔ڈی جی پنجاب واسا  نے کہا کہ تمام ڈسپوزل اسٹیشنز کو فل کپیسٹی پر چلایا جا رہا ہے،  ہنگامی صورتحال سے نمٹنے کیلئے ریسکیو ٹیمیں فیلڈ میں الرٹ ہیں۔ڈی جی واسا نے کہا کہ تمام وسائل بروئے کار لاتے ہوئے نشیبی علاقوں سے نکاسی آب کو ممکن بنایا جائے۔

ان کا کہنا تھا کہ تمام واسا دفاتر کو ہدایات جاری کی گئیں ہیں کہ بارش کے دوران اور بعد میں پانی کی نکاسی کی مسلسل نگرانی کی جائے۔ واضح رہے کہ پنجاب بھرمیں جاری مون سون بارشوں کے تباہ کن سپیل میں 36 گھنٹے میں 63 اموات رپورٹ ہوئیں جس میں بچے اور خواتین بھی شامل ہیں۔راولپنڈی اور اسلام آباد میں کل رات سے ہونے والی موسلا دھار بارش نے جل تھل ایک کر دیا۔

نالہ لئی میں پانی کی سطح بلند ہونے کے باعث خطرے کے الارم بجا دیئے گئے ہیں اور قریبی آبادی کو محفوظ مقام پر منتقل ہونے کی ہدایت جاری کر دی گئی۔ بارش کے باعث نالہ لئی میں پانی کی سطح کٹاریاں کے مقام پر 20  فٹ اور گوالمنڈی پل پر 19 فٹ ہو گئی  جبکہ دریائے سواں میں بھی پانی کی سطح بلند ہونے سے پل زیر آب آ گیا۔موسلا دھار بارش کے باعث شاہ پور اور راولپنڈی اسلام آباد کو ملانے والا پل پانی میں ڈوب گیا جبکہ پولیس فاؤنڈیشن گلی نمبراے فائیو میں بارش کا پانی گھروں میں داخل ہو گیا۔

ادھر چکری روڈ گاؤں لادیاں میں سیلاب کے باعث ایک فیملی بچوں سمیت چھت پر پھنس گئی جسے نکالنے کیلئے ہیلی کاپٹر پہنچ گیا ہے۔ جہلم میں رات سے جاری بارش کے باعث ندی نالوں میں طغیانی ہے۔ ضلعی انتظامیہ نے سیلاب میں پھنسے افراد کو ریسکیو کرنے کیلئے فوج سے مدد طلب کرلی ہے۔