گاڑی میں غیر معیاری پٹرول ڈلوانے پر ایرانی صدر کی گاڑی خراب، مسعودپزشکیان کو ٹیکسی میں سفرکرنا پڑ گیا

پانی ملے پیٹرول کے باعث گاڑیاں خراب ہوگئیں اور قافلہ درمیان میں رک گیا جس کے بعد ایرانی صدر نے مقامی حکام کو اطلاع دیے بغیر خود ہی ایک نجی ٹیکسی کا انتظام کیا اور تبریز پہنچے

فیصل علوی جمعہ 18 جولائی 2025 11:52

تہران(اردوپوائنٹ اخبار تازہ ترین۔18جولائی 2025)گاڑی میں غیر معیاری پٹرول ڈلوانے پر ایرانی صدر کی گاڑی خراب ، مسعودپزشکیان کو ٹیکسی میں سفرکرناپڑگیا،پانی ملے پیٹرول کے باعث گاڑیاں خراب ہوگئیں اور قافلہ درمیان میں رک گیا جس کے بعد ایرانی صدر نے مقامی حکام کو اطلاع دیے بغیر خود ہی ایک نجی ٹیکسی کا انتظام کیا اور تبریز پہنچے، ایرانی میڈیا کے مطابق ایرانی صدر تبریز جا رہے تھے اس دوران قافلے کی 3 گاڑیوں میں قزوین صوبے کے پیٹرول سٹیشن سے پٹرول ڈلوایا گیا تاہم پانی ملے پٹرول کے باعث گاڑیاں خراب ہوگئیں اور قافلہ درمیان میں رک گیا جس کے بعد ایرانی صدر نے مقامی حکام کو اطلاع دئیے بغیر خود ہی ایک نجی ٹیکسی کا انتظام کیا اور تبریز پہنچے۔

اعلیٰ حکومتی عہدیدار نے بتایا کہ مذکورہ پیٹرول پمپ پانی ملا ناقص پیٹرول فراہم کر رہا تھا اور اس کے خلاف پہلے بھی اسی قسم کی خلاف ورزیوں کی شکایات درج ہو چکی ہیں۔

(جاری ہے)

حکومتی عہدیدار نے بتایا کہ تحقیقات کے مطابق مذکورہ پٹرول پمپ پانی ملا ناقص پٹرول فراہم کر رہا تھا اور اس کے خلاف پہلے بھی اسی قسم کی خلاف ورزیوں کی شکایات درج ہو چکی ہیں۔

ایرانی نیشنل آئل پروڈکٹس ڈسٹری بیوشن کمپنی نے بھی تصدیق کی ہے کہ اس پٹرول پمپ کے خلاف ماضی میں ایندھن کے معیار پر شکایات موصول ہو چکی تھیں تاہم یہ واضح نہیں کیا گیا کہ وہ سٹیشن اب تک کیوں فعال ہے۔تاہم صدارتی دفتر یا وزارت تیل کی جانب سے اس واقعہ پر کوئی سرکاری بیان جاری نہیں کیا گیا۔واضح رہے کہ ایرانی صدر مسعود پزشکیان نے کہا تھا کہ پاکستان کے ساتھ تعلقات کو انتہائی اہمیت دیتے تھے۔

جنگ کے دوران پاکستان کی حمایت کو کبھی نہیں بھول سکتے۔ان خیالات کااظہار ایرانی صدر نے وفاقی وزیر داخلہ محسن نقوی سے ملاقات کے دوران کیاتھا۔ وفاقی وزیر داخلہ محسن نقوی نے تہران میں ایران کے صدر مسعود پزشکیان سے ملاقات کی جس میں باہمی دلچسپی کے امور، پاک ایران تعلقات اور دوطرفہ تعاون پر تبادلہ خیال کیا گیاتھا۔محسن نقوی نے ایرانی صدر کو اسرائیل کیخلاف جنگ میں عظیم فتح پر مبارکباد پیش کی تھی اور کہا تھاکہ ایرانی سپریم لیڈر آیت اللہ خامنہ ای کی دانشمندانہ قیادت اور بہترین حکمت عملی نے جنگ میں فیصلہ کن کردار ادا کیاتھا جو امت مسلمہ کیلئے باعث فخر تھی۔

ایرانی صدر کا گفتگو کے دوران یہ بھی کہناتھا کہ صہیونی حکومت مسلم ممالک کے درمیان تقسیم اور کمزوری پیدا کرنے کی کوشش کر رہی تھی اس لئے اسلامی ممالک کے درمیان اتحاد اور ہم آہنگی ناگزیر تھی۔ اگر مسلم ممالک اسلامی اتحاد کی اہمیت کو سمجھ جائیں تو صہیونی حکومت کے خلاف متحد محاذ قائم کیا جا سکتا تھا۔