آئی ٹی برآمدات میں مجموعی طور پر 18 فیصد اضافہ ہوا ہے، شزہ فاطمہ خواجہ

جمعہ 18 جولائی 2025 22:40

اسلام آباد (اُردو پوائنٹ اخبارتازہ ترین - اے پی پی۔ 18 جولائی2025ء) وفاقی وزیر انفارمیشن ٹیکنالوجی شزہ فاطمہ خواجہ نے کہا ہے کہ مالی سال 2024ـ25ء کے دوران پاکستان کی آئی ٹی، آئی ٹی ایز اور فری لانسرز کی برآمدات 3.8 ارب ڈالر کی ریکارڈ سطح تک پہنچ گئی ہیں، آئی ٹی برآمدات میں مجموعی طور پر 18 فیصد اضافہ ہوا ہے۔

(جاری ہے)

جمعہ کو اپنے ایک بیان میں وفاقی وزیر شزہ فاطمہ خواجہ نے کہا کہ یہ نمایاں کامیابی وزیراعظم شہباز شریف کی ذاتی دلچسپی اور حکومت کی موثر حکمت عملی کا نتیجہ ہے، وزیراعظم شہباز شریف کی قیادت میں وزارت انفارمیشن ٹیکنالوجی کی پانچ کلیدی شعبوں میں مرکوز پالیسی اقدامات نے اس ترقی میں کلیدی کردار ادا کیا ہے، ان شعبوں میں عالمی سطح پر پاکستان کی شناخت، ٹیلنٹ اور انفراسٹرکچر میں سرمایہ کاری، پالیسی اقدامات کے ذریعے تحفظ اور معاونت کی فراہمی، مستحکم اور تیز رفتار انٹرنیٹ کی فراہمی یقینی بنانا ہے۔

انہوں نے کہا کہ قومی ڈیجیٹلائزیشن بالخصوص ڈیجیٹل معیشت اور کیش لیس پاکستان کی جانب پیشرفت شامل ہیں، یہ ترقی حکومتی وژن اور پالیسی سازی کی کامیابی ہے۔ شزہ فاطمہ خواجہ نے کہا کہ پاکستان کے باصلاحیت آئی ٹی ماہرین، سٹارٹ اپس اور فری لانسرز کی انتھک کوششیں پاکستان کو عالمی ٹیک فورس بنا رہے ہیں۔\932