بھارت کو ہر محاذ پر شرمندگی کا سامنا ہے، مودی کے نقشِ قدم پر چلتے بھارتی کرکٹرز نے کھیل کو نفرت کی نذر کر دیا، شیری رحمن

اتوار 20 جولائی 2025 12:40

اسلام آباد (اُردو پوائنٹ اخبارتازہ ترین - اے پی پی۔ 20 جولائی2025ء) پاکستان پیپلز پارٹی کی نائب صدر سینیٹر شیری رحمن نے کہا ہے کہ میدانِ جنگ میں شکست، سفارت کاری میں ناکامی اور اب کھیل سے فرار ،بھارت کو ہر محاذ پر شرمندگی کا سامنا ہے، مودی کے نقشِ قدم پر چلتے بھارتی کرکٹرز نے کھیل کو نفرت کی نذر کر دیا۔

(جاری ہے)

سینیٹر شیری رحمان نے بھارت کی جانب سے لیجنڈز کرکٹ لیگ میں پاکستان کے خلاف کھیلنے سے انکار پر اپنے ردعمل میں کہا کہ مودی کے نقشِ قدم پر چلتے بھارتی کرکٹرز نے کھیل کو نفرت کی نذر کر دیا، میدانِ جنگ میں شکست، سفارت کاری میں ناکامی اور اب کھیل سے فرار بھارت کو ہر محاذ پر شرمندگی کا سامنا ہے۔

انہوں نے کہا کہ بھارتی کھلاڑیوں کا نفرت اور تعصب سے آلودہ طرزِ عمل ان کی مودی پرست ذہنیت کی عکاسی کرتا ہے۔ شیری رحمن نے کہا کہ کھیل امن، رواداری اور باہمی احترام کے پیغامبر ہوتے ہیں مگر بھارت نے یہاں بھی تنگ نظری کا مظاہرہ کیاہے۔ انہوں نے کہا کہ پاکستان کا نام سنتے ہی مودی سرکار کے اعصاب جواب دے جاتے ہیں اور ان کے کھلاڑی میدان سے راہِ فرار اختیار کر لیتے ہیں۔ شیری رحمان نے کہا کہ کھیل کی بجائے نفرت کے ایجنڈے پر کاربند بھارتی رویہ خطے کے امن اور سپورٹس مین شپ کے لیے خطرہ ہے۔