Live Updates

وزیراعلٰی خیبرپختونخواہ کی صوبہ بھر میں سیاحتی اضلاع کی انتظامیہ کو الرٹ رہنے کی ہدایت

سیاحتی علاقوں میں سیاحوں کو موسمی حالات کے خطرات سے متعلق آگاہی دی جائے، سیلاب اور دیگرقدرتی آفات کی صورت میں عوامی تحفظ کیلئے انتظامات مکمل کئے جائیں۔ وزیراعلٰی خیبرپختونخواہ علی امین گنڈاپور

ثنااللہ ناگرہ پیر 21 جولائی 2025 23:48

وزیراعلٰی خیبرپختونخواہ کی صوبہ بھر میں سیاحتی اضلاع کی انتظامیہ کو ..

پشاور(اُردو پوائنٹ اخبارتازہ ترین۔ 21 جولائی2025ء) خیبر پختونخوا میں اگلے چند دنوں میں مزید مون سون بارشوں کی پیشگوئی کردی گئی۔ جس کے پیش نظر وزیراعلٰی علی امین خان گنڈاپور نے صوبہ بھر خصوصا سیاحتی اضلاع کی انتظامیہ کو الرٹ رہنے کی ہدایت کردی ہے۔ وزیراعلٰی خیبرپختونخواہ علی امین گنڈاپور نے کہا کہ بارشوں کی وجہ سے ممکنہ خطرات سے نمٹنے کے لئے پوری انتظامیہ ہر لحاظ سے الرٹ رہے۔

پولیس، بلدیات، آبپاشی، ریسکیو اور ضلعی انتظامیہ کے اہلکاروں کی فیلڈ میں موجودگی یقینی بنائی جائے، سیلاب اور دیگر قدرتی آفات کی صورت میں مالی و جانی نقصانات کو کم سے کم کرنے کے لئے ضروری انتظامات مکمل کئے جائیں۔ سیاحتی علاقوں میں موجود سیاحوں کو موسمی حالات کے پیش نظر درپیش خطرات سے متعلق آگہی دی جائے، متوقع بارشوں کی وجہ سے لینڈ سلائیڈنگ سے بند ہونے والی سڑکوں کو بروقت کھولنے کے درکار مشینری کی دستیابی کو یقینی بنایا جائے۔

(جاری ہے)

تمام اضلاع میں ایمرجنسی کنٹرول رومز کو 24 گھنٹے فعال کیا جائے، کسی بھی ناخوشگوار واقعے کی صورت میں ضلعی انتظامیہ کے حکام ریسکیو اور امدادی سرگرمیوں کی خود نگرانی کریں۔

یاد رہے محکمہ موسمیات نے کہا ہے کہ 21 سے25 جولائی کے دوران شدید بارش کے باعث چترال، دیر، سوات، شانگلہ، مانسہرہ، کوہستان،ایبٹ آباد، بونیر،چارسدہ، صوابی، مردان، مری، گلیات، نوشہرہ، اسلام آباد/راولپنڈی، ڈیرہ غازی خان، شمال مشرقی پنجاب ،کشمیر اور بلوچستان کے مقامی / بر ساتی ندی نالوں میں طغیانی کا خطرہ ہے ۔

عوام کو احتیاط کی ہدایت کی گئی ہے،21 سے25 جولائی کے دوران شدید بارشوں کے باعث اسلام آباد/راولپنڈی، گوجرانوالہ، لاہور، سیالکوٹ، سرگودھا، فیصل آباد، اوکاڑہ، نوشہرہ اور پشاور کے نشیبی علا قے زیر آب آنے کاخدشہ ہے، 21 سے25 جولائی کے دوران شدید بارشوں کے باعث خیبرپختونخوا، مری، گلیات، کشمیر اور گلگت بلتستان میں لینڈ سلائیڈنگ کے باعث ٹریفک کی آمدورفت متاثر ہونے کا خطرہ ہے، شدید بارشوں /آندھی/جھکڑ چلنے اورگرج چمک کے باعث روزمرہ کے معمولات متاثر ہونے ، کمزور انفرا سٹرکچر (کچے گھر/دیواریں ،بجلی کے کھمبے،بل بورڈز،گاڑیوں سولر پینل وغیرہ)کو نقصان کا اندیشہ ہے۔

محکمہ موسمیات کے مطابق کل منگل کوکشمیر ، خیبر پختونخوا، اسلام آباد، پنجاب اورگلگت بلتستان میں تیز ہوائوں اور گرج چمک کے ساتھ بارش کی توقع۔ اس دوران بالائی خیبر پختونخواہ ، خطہ پو ٹھو ہار، شمال مشرقی پنجاب،کشمیر اور ملحقہ پہاڑی علاقوں میں چند مقامات پر موسلادھار بارش کا امکان ہے۔ ملک کے دیگر علاقوں میں موسم گرم اور حبس رہنے کا امکان ہے،گزشتہ 24 گھنٹوں کے دوران ملک کے بیشترعلاقوں میں موسم گرم اور مرطوب رہا تا ہم اسلام آباد، بالائی پنجاب، خیبر پختونخوا، شمال مشرقی بلوچستان ، سندھ اور کشمیر میں تیزہوائوں اور گرج چمک کے ساتھ بارش جبکہ چند مقامات پر موسلا دھار بارش بھی ہوئی ۔

سب سے زیادہ بارش پنجاب: اسلام آباد(سیدپور 163، گو لڑہ 43، زیرو پوائنٹ 13، بوکرہ 03)، مری، سیالکوٹ(سٹی) 04، خیبر پختونخوا : بالاکوٹ 54، پا را چنار 25، مالم جبہ 03،کا کول 02، چراٹ 02، بلوچستان:خضدار 14، سبی 01، سندھ: تھر پارکر(نگر پارکر 06، ڈپلو 03)، سکھر 04،کشمیر: کوٹلی 06، مظفر آباد 04، اور گڑھی دوپٹہ 02، مٹھی میں 01 ملی میٹر بارش ریکارڈ کی گئی۔ آج ریکارڈکئے گئے زیادہ سےزیادہ درجہ حرارت: نوکنڈی ،دالبندین 45 اور چلاس میں43سینٹی گریڈ ریکارڈ کیا گیا۔