شدید بارشوں کے باعث ملک بھر کے نشیبی علا قے زیر آب آنے کاخدشہ ہے، محکمہ موسمیات کا انتباہ

اسلام آباد (اُردو پوائنٹ اخبارتازہ ترین - اے پی پی۔ 22 جولائی2025ء) محکمہ موسمیات نےانتباہ جاری کرتے ہوئے کہا ہے کہ منگل کی رات اور23 جولائی کے دوران شدید بارش کے باعث چترال، دیر، سوات، شانگلہ، مانسہرہ، کوہستان،ایبٹ آباد، بونیر،چارسدہ، صوابی، مردان، مری، گلیات، نوشہرہ، اسلام آباد/راولپنڈی، ڈیرہ غازی خان، شمال مشرقی پنجاب ،کشمیر اور بلوچستان کے مقامی /بر ساتی ندی نالوں میں طغیانی کا خطرہ ہے ،عوام الناس کو احتیاط کی ہدایت کی گئی ہے،شدید بارشوں کے باعث اسلام آباد/راولپنڈی، گوجرانوالہ، لاہور، سیالکوٹ، سرگودھا، فیصل آباد، اوکاڑہ، نوشہرہ اور پشاور کے نشیبی علا قے زیر آب آنے کاخدشہ ہے، شدید بارشوں کے باعث خیبرپختونخوا، مری، گلیات، کشمیر اور گلگت بلتستان میں لینڈ سلائیڈنگ کے باعث ٹریفک کی آمدورفت متاثر ہونے کا خطرہ ہے۔

(جاری ہے)

شدید بارشوں /آندھی/جھکڑ چلنے اورگرج چمک کے باعث روزمرہ کے معمولات متاثر ہونے ، کمزور انفرا سٹرکچر ( کچے گھر/دیواریں ،بجلی کے کھمبے،بل بورڈز،گاڑیوں سولر پینل وغیرہ)کو نقصان کا اندیشہ ہے۔محکمہ موسمیات کے مطابق (کل )بدھ کو کشمیر ، خیبرپختونخوا، اسلام آباد، پنجاب،گلگت بلتستان اور شمال مشرقی بلوچستان میں تیز ہواؤں اور گرج چمک کے ساتھ بارش کی توقع ہے۔

اس دوران بالائی خیبر پختونخوا ، خطہ پو ٹھو ہار، شمال مشرقی پنجاب اورکشمیر میں موسلادھار بارش کا امکان ہے۔ ملک کے جنوبی علاقوں میں موسم گرم اور حبس رہنے کا امکان ہے۔گزشتہ 24 گھنٹوں کے دوران اسلام آباد، بالائی پنجاب، کشمیر بالائی خیبر پختونخوا، گلگت بلتستان اور قلات میں تیزہواؤں اور گرج چمک کے ساتھ بارش جبکہ چند مقامات پر موسلا دھار بارش بھی ہوئی ۔

ملک کے دیگرعلاقوں میں موسم گرم اور مرطوب رہا۔سب سے زیادہ بارش پنجاب میں اسلام آباد (سیدپور 101، گولڑہ 78، بوکرہ 68، زیرو پوائنٹ 35، ایئرپورٹ 24)، راولپنڈی (کچہری 85، گوالمنڈی 55، چکلالہ 46، شمس آباد، پیرودھائی 32، نیو کٹاریاں 27)، نارووال 69، مری 42، جہلم 40، منگلا 31، فیصل آباد 12، سیالکوٹ (سٹی 03، ایئرپورٹ 02)، گجرات 01، کشمیر میں مظفرآباد (ایئرپورٹ 79، شہر 71)، کوٹلی 64، گڑھی دوپٹہ 38، راولا کوٹ 13، خیبر پختونخوا میں بالاکوٹ 47، تخت بھائی 37، سیدو شریف 34، کاکول 28، مالم جبہ 18، دیر (زیریں 19، بالائی 04)، پٹن 02، بلوچستان: قلات 28، گلگت بلتستان میں گلگت میں ایک ملی میٹر بارش ریکارڈ کی گئی۔

منگل کو ریکارڈ کئے گئے زیادہ سےزیادہ درجہ حرارت نوکنڈی 46، دالبندین 45 اور دادو میں44سینٹی گریڈ ریکارڈ کیا گیا۔