کرکٹ ٹیلنٹ ہنٹ ٹرائلز میں سندھ بھر سے 15 ہزار سے زائد نوجوانوں کی شرکت

جمعرات 24 جولائی 2025 20:00

لاڑکانہ (اُردو پوائنٹ اخبارتازہ ترین - اے پی پی۔ 24 جولائی2025ء) وزیراعظم یوتھ پروگرام (پی ایم وائی پی) اور لاہور قلندرز کے اشتراک سے منعقدہ کرکٹ ٹیلنٹ ہنٹ ٹرائلز میں سندھ بھر سے 15ہزار سے زائد نوجوان کرکٹرز نے لاڑکانہ اور سکھر میں شرکت کی۔لاڑکانہ میں 7ہزار سے زائد نوجوان گرمی اور دبائو کے باوجود میدان میں اترے جبکہ سکھر میں 8ہزارسے زائد لڑکوں اور لڑکیوں نے بھرپور شرکت کی جو ملک بھر میں اب تک کی سب سے بڑی شرکت میں سے ایک تھی۔

یہ مہم صرف ایک ٹیلنٹ ہنٹ ہی نہیں بلکہ کرکٹ تک مساوی رسائی کی ایک تحریک ہے جس کا مقصد قومی کھیل کو اس کی اصل جڑوں تک واپس لانا ہے۔ لاہور قلندرز کی ٹیلنٹ ڈویلپمنٹ مہارت اور حکومت کے پی ایم وائی پی کے تعاون سے نوجوانوں کو میرٹ کی بنیاد پر آگے بڑھنے کا سنہری موقع دیا جا رہا ہے۔

(جاری ہے)

لاہور قلندرز کے سی ای او عاطف رانا نے لاڑکانہ اور سکھر میں ٹیلنٹ اور جوش دیکھ کر اسے "ایک کرکٹ انقلاب" قرار دیا، یہ نوجوان نہ صرف جوش بلکہ نظم، مہارت اور سیکھنے کی لگن کے ساتھ میدان میں اترے، ہم ہمیشہ سے یقین رکھتے آئے ہیں کہ پاکستان کے چھوٹے شہروں اور دیہاتوں میں اگلے سپر سٹارز چھپے ہیں۔

عاطف رانا نے بتایا کہ اس منصوبے کے تحت سندھ کی پانچ علاقائی ٹیمیں تشکیل دی جائیں گی جنہیں مستقل مواقع، تربیت اور پیشہ ورانہ ترقی فراہم کی جائے گی، ہم صرف ایونٹ کرانے نہیں آئے، ہم یہاں زندگیاں بدلنے اور پائیدار کرکٹ سسٹم بنانے آئے ہیں، جہاں ہر ہنر مند کھلاڑی کو انصاف پر مبنی موقع ملے۔ ٹرائلز کے اختتام پر کئی نوجوان جذباتی ہو گئے۔ ایک نوجوان لڑکی نے کہا کہ یہ موقع میری زندگی بدل چکا ہے، اب مجھے یقین ہے کہ میں ایک دن قومی ٹیم میں جگہ بنا سکتی ہوں۔ منتخب ہونے والے کھلاڑیوں نے وزیراعظم شہباز شریف، پی ایم وائی پی اور لاہور قلندرز کا دل سے شکریہ ادا کیا جنہوں نے اس خواب کو حقیقت کا رنگ دیا، ان کے لیے یہ صرف ٹرائل نہیں، بلکہ امید، شناخت اور خواب دیکھنے کا حق تھا۔