اسلام آباد میں 6 ملکی ریجنل چیفس آف ڈیفنس سٹاف کانفرنس، علاقائی سلامتی، فوجی سفارتکاری پر تبادلہ خیال

ہفتہ 26 جولائی 2025 22:57

راولپنڈی (اُردو پوائنٹ اخبارتازہ ترین - این این آئی۔ 26 جولائی2025ء)فیلڈ مارشل عاصم منیر نے عالمی خطرات اور پیچیدہ ہائبرڈ چیلنجز میں باہمی فوجی تعاون ناگزیر قرار دے دیا ۔آئی ایس پی آرکے مطابق اسلام آباد میں پاکستان کی زیر میزبانی مضبوط ربط، محفوظ امن کے عنوان سے ریجنل چیفس آف ڈیفنس سٹاف کانفرنس کا انعقاد کیا گیا، فیلڈ مارشل عاصم منیر نے کانفرنس میں شریک ہونے والے اعلی عسکری حکام کا خیر مقدم کیا۔

آئی ایس پی آر کے مطابق کانفرنس میں امریکا، قازقستان، کرغزستان، تاجکستان اور ازبکستان کے اعلی عسکری حکام نے شرکت کی۔کانفرنس کے مقاصد میں بہتر اقدامات، دہشت گردی کے خلاف جنگ میں تعاون کا فروغ شامل ہے، ریجنل چیفس آف ڈیفنس اسٹاف کانفرنس کا مقصد باہمی تعاون کی مضبوطی ہے۔

(جاری ہے)

بیان کے مطابق اعلی سطح کے اس مکالمے میں علاقائی سلامتی کی صورتِ حال، وسطی اور جنوبی ایشیا کے تزویراتی حالات میں تبدیلی، مشترکہ تربیتی اقدامات، انسداد دہشت گردی میں تعاون اور بحرانوں کے دوران مربوط انسانی ہمدردی پر مبنی ردِ عمل جیسے امور پر تفصیلی تبادلہ خیال کیا گیا۔

بیان کے مطابق کانفرنس میں شریک وفود نے اجتماعی طور پر امن، احترام، قومی خودمختاری کے تحفظ، دہشت گردی، سائبر سیکیورٹی کے خطرات اور پرتشدد انتہا پسندی جیسے مشترکہ خطرات سے نمٹنے کے لیے اپنے عزم کا اعادہ کیا۔ اور دفاعی سفارت کاری کو فروغ دینے کے لیے پاکستان کی قیادت، مہمان نوازی اور اس اقدام کو سراہا ہے۔بیان کے مطابق اسٹریٹجک ہم آہنگی پاکستان کے اس دیرینہ عزم کی عکاس ہے کہ وہ ایک محفوظ، مربوط، اور باہمی تعاون پر مبنی علاقائی نظام تشکیل دے، جو مشترکہ سلامتی کے مفادات اور علاقائی یکجہتی پر مبنی ہو۔

آئی ایس پی آر کے مطابق فیلڈ مارشل عاصم منیر نے اپنے خطاب میں خطے میں امن، استحکام اور تعمیری کردار ادا کرنے کے عزم کا اعادہ کرتے ہوئے کہا کہ درپیش چیلنجز کے تناظر میں اسٹریٹجک مکالمہ اور باہمی اعتماد اہمیت کا حامل ہے۔فیلڈ مارشل عاصم منیر نے کہا کہ پاکستان خطے کے محفوظ اور خوشحال مستقبل کیلئے پر عزم ہے۔انہوں نے کہا کہ عالمی خطرات، پیچیدہ ہائبرڈ چیلنجز میں باہمی فوجی تعاون اشد ضروری ہے۔