Live Updates

ہفتہ وار مہنگائی کی شرح میں 4 فیصد سے زائد کا بڑا اضافہ

رواں ہفتے کے دوران انڈے، ٹماٹر، دودھ، دہی، سمیت 14 اشیاء مزید مہنگی ہو جانے سے مہنگائی کی ہفتہ وار شرح 2.22فیصد ہوگئی

محمد علی ہفتہ 26 جولائی 2025 21:37

لاہور (اُردو پوائنٹ اخبارتازہ ترین۔ 26 جولائی2025ء) ہفتہ وار مہنگائی کی شرح میں 4 فیصد سے زائد کا بڑا اضافہ، رواں ہفتے کے دوران انڈے، ٹماٹر، دودھ، دہی، سمیت 14 اشیاء مزید مہنگی ہو جانے سے مہنگائی کی ہفتہ وار شرح 2.22فیصد ہوگئی۔ تفصیلات کے مطابق ملک بھر میں ہفتہ وار بنیادوں پر مہنگائی کی شرح بڑھ کر4.07 فیصد ہو گئی، جس کی بنیادی وجہ گیس اور بجلی کی قیمتوں میں اضافہ ہے۔

پاکستان ادارہ شماریات کی جانب سے جاری کردہ مہنگائی سے متعلق ہفتہ وار رپورٹ کے مطابق سالانہ بنیادوں پر مہنگائی کی شرح 2.22 فیصد ہوگئی۔ ادارہ شماریات کے مطابق 24 جولائی کو ختم ہونے والے ہفتے کے دوران 14 اشیائے ضروریہ کی قیمتوں میں اضافہ ہوا، جبکہ حالیہ ہفتے میں 12 اشیاء سستی اور 25 مصنوعات کی قیمتیں مستحکم رہیں۔

(جاری ہے)

رپورٹ کے مطابق حالیہ ہفتے کے دوران ٹماٹر 22.93 فیصد، انڈے 3.96 فیصد مہنگے ہوئے، جبکہ لہسن، بیف، دودھ، دہی، سیگریٹس، انرجی سیور کی قیمتوں میں بھی اضافہ ہوا۔

اسی طرح چکن 7.95 اور چینی کی قیمتوں میں 4.25 فیصد کی کمی ہوئی، جبکہ پیاز، کیلے، آلو، آٹا، دالیں، ایل پی جی کے نرخوں میں بھی کمی ریکارڈ کی گئی۔ یوں ملک میں مہنگائی کی مجموعی سالانہ شرح 2.22 فیصد ہوگئی۔ دوسری جانب میڈیا رپورٹس کے مطابق حکومت کے مہنگائی 60 سال کی کم ترین سطح پر آ جانے کے دعووں کے برعکس مہنگائی نے عوام کو بھرکس نکال دیا ہے۔

سبزیوں اور پھلوں کی قیمتوں میں ہوش ربا اضافہ دیکھنے میں آیاہے جس نے خریداروں کی قوتِ خرید کو بری طرح متاثر کیاہے۔ مارکیٹوں میں ٹماٹر، آلو، پیاز، لیموں، ادرک، لہسن سمیت روزمرہ استعمال کی تمام سبزیاں سرکاری ریٹ سے کہیں زیادہ قیمت پر فروخت کی جا رہی ہیں، پھلوں کی قیمتیں بھی عام آدمی کی پہنچ سے باہر ہو چکی ہیں، آم، سیب، کیلا، انگور اور دیگر پھلوں کے نرخ اتنے زیادہ ہیں کہ شہری انہیں صرف دیکھ کر ہی واپس پلٹنے پر مجبور ہو جاتے ہیں۔