Live Updates

امریکا میں اسحاق ڈار نے کہا کہ عافیہ صدیقی کی طرح عمران خان کو بھی درست سزا دی گئی ہے

اس شخص کو شرم آنی چاہیے جوشریف خاندان کی چاکری میں قوم کی بیٹی کو امریکہ کے قدموں میں بیچ رہا ہے، عافیہ صدیقی ہو یا عمران خان اس ظلم اور جھوٹ کے پیچھے ایک ہی سوچ ہے، مرکزی ترجمان پی ٹی آئی کا بیان

ثنااللہ ناگرہ ہفتہ 26 جولائی 2025 20:31

امریکا میں اسحاق ڈار نے کہا کہ عافیہ صدیقی کی طرح عمران خان کو بھی درست ..

اسلام آباد (اُردو پوائنٹ اخبارتازہ ترین۔ 26 جولائی 2025ء) پاکستان تحریک انصاف کے مرکزی شعبہ اطلاعات نے الزام عائد کیا ہے کہ امریکا میں اسحاق ڈار نے کہا کہ عافیہ صدیقی کی طرح عمران خان کو بھی درست سزا دی گئی ہے۔ پاکستان تحریک انصاف کی جانب سے اسحاق ڈار کے شرمناک، جھوٹے اور منافقانہ بیان کی شدید مذمت کی گئی ہے۔ ترجمان پی ٹی آئی نے ایکس پر جاری بیان میں کہا کہ امریکہ میں وزیر خارجہ اسحاق ڈار نے کہا کہ "جیسے عافیہ صدیقی کو درست سزا دی گئی، ویسے ہی عمران خان کو بھی۔

" یہ صرف جھوٹ نہیں بلکہ ایک مظلوم پاکستانی بیٹی اور پاکستان کے سب سے مقبول عوامی لیڈر دونوں کے خلاف بغض، غلامی اور ضمیر فروشی کی انتہا ہے۔ عافیہ صدیقی کو 2003 میں کراچی سے اغوا کیا گیا اور جھوٹے الزامات کے تحت امریکہ میں 86 سال قید کی سزا دی گئی، حالانکہ مقدمے میں نہ کوئی امریکی زخمی ہوا، نہ ثبوت پیش کیا گیا۔

(جاری ہے)

ان کا جرم صرف یہ تھا کہ وہ پاکستانی اور مسلمان تھیں۔

دو روز قبل وزیراعظم شہباز شریف نے عافیہ کی بہن ڈاکٹر فوزیہ صدیقی سے ملاقات کی، انصاف کی یقین دہانی کروائی، اور اسی حکومت کا وزیر امریکہ میں جا کر عافیہ کی سزا کو درست قرار دے رہا ہے، صرف اس لیے کہ عمران خان پر دی گئی انتقامی سزاؤں کو جائز ثابت کیا جا سکے۔ یہی اس حکومت کی دوغلی پالیسی ہے۔ ایک طرف خود مانتے ہیں کہ عمران خان پاکستان کے مقبول ترین لیڈر ہیں، دوسری طرف جھوٹ بولتے ہیں کہ انہوں نے ریاست پر حملہ کیا۔

شرم آنی چاہیے اس شخص کو جو شریف خاندان کی چاکری میں اپنی قوم، اپنی بیٹی اور اپنے رہنما کو امریکہ کے قدموں میں بیچ رہا ہے۔ پاکستان تحریک انصاف اس بیان کو مکمل طور پر مسترد کرتی ہے اور عوام کو بتانا چاہتی ہے کہ چاہے وہ عافیہ صدیقی ہو یا عمران خان، ظلم اور جھوٹ کے پیچھے ایک ہی سوچ ہے اور وہ ہے اقتدار کی حوس، سچ کا گلا گھونٹنے کا نظام اور ضمیر بیچنے کی پرانی عادت ۔