ٹرمپ بار بار پاک بھارت جنگ بندی کا کریڈٹ لینے کو بے تاب، 27 ویں بار تذکرہ کر ڈالا

سکاٹ لینڈ میں یورپی کمیشن کی سربراہ سے ملاقات کے موقع پر بھی امریکی صدر جنگ بندی کرانے کا ذکر کرنا نہ بھولے

ساجد علی پیر 28 جولائی 2025 10:31

ٹرمپ بار بار پاک بھارت جنگ بندی کا کریڈٹ لینے کو بے تاب، 27 ویں بار تذکرہ ..

واشنگٹن ( اُردو پوائنٹ اخبارتازہ ترین۔ 28 جولائی 2025ء ) امریکہ کے صدر ڈونلڈ ٹرمپ بار بار پاکستان اور بھارت کے درمیان جنگ بندی کروانے کا کریڈٹ لینے کو بے تاب دکھائی دیتے ہیں اور شاید یہی وجہ ہے کہ انہوں نے 27 ویں بار اس کا تذکرہ کر ڈالا۔ تفصیلات کے مطابق سکاٹ لینڈ میں یورپی کمیشن کی سربراہ سے ملاقات کے موقع پر میڈیا سے گفتگو کرتے ہوئے ڈونلڈ ٹرمپ ایک بار پھر رواں برس مئی کے مہینے میں پاکستان اور بھارت کے درمیان ہونے والی جھڑپوں کو ختم کرانے کے لیے جنگ بندی کرانے میں اپنے کردار کا ذکر کرنا نہ بُھولے اور اب مجموعی طور پر 27 ویں بار ایسا ہوا ہے کہ انہوں نے پاک بھارت سیز فائر کا کریڈٹ لیا، اس بار بھی ٹرمپ نے حسبِ معمول کہا کہ پاکستان اور بھارت بڑی جنگ کے بہت قریب تھے لیکن میں نے دونوں ملکوں سے تجارت پر بات کرکے یہ جنگ رکوا دی۔

(جاری ہے)

یہاں قابل ذکر بات یہ ہے کہ امریکی صدر ٹرمپ کے لیے پاکستان اور بھارت کے درمیان جنگ بندی کروانا جتنا ان کا پسندیدہ موضوع ہے تو اس مقابلے میں بھارتی وزیراعظم نریندر مودی اتنا ہی زیادہ اس پر بات کرنے سے کتراتے ہوئے نظر آتے ہیں اور یہی وجہ ہے کہ انہوں نے اس موضوع پر مسلسل خاموشی اختیار کی ہوئی ہے جس کا فائدہ اٹھاتے ہوئے بھارت کی حزب اختلاف جماعتیں خاص طور پر کانگریس مودی سرکار کو مسلسل کڑی تنقید کا نشانہ بناتی ہوئی نظر آتی ہے۔

دوسری طرف وزیراعظم شہباز شریف اس معاملے پر کئی بار امریکی صدر کی دل کھول کر تعریفیں کرچکے ہیں اور انہوں نے بارہا یہ کہا ہے کہ جنگ بندی کے لیے امریکی صدر ٹرمپ کے اہم کردار کو سراہتے ہیں صدر ٹرمپ نے ثابت کیا کہ وہ امن کے پیامبر ہیں، امریکی صدر ٹرمپ سرد اور گرم جنگ کے خلاف ہیں، امن کے فروغ، اقتصادی روابط میں اضافےکے لیے صدرٹرمپ کی کوشش قابل ستائش ہے۔