پاکستان کسٹمز نے ایک ارب 15کروڑ روپے مالیت کی ضبط شدہ اشیا تلف اورنذر آتش کردیں

کراچی (اُردو پوائنٹ اخبارتازہ ترین - این این آئی۔ 30 جولائی2025ء)پاکستان کسٹمز نے ضبط کی گئی ایک ارب 15کروڑ روپے مالیت کی ممنوعہ،مضر صحت زائد المیعاد اسمگلڈ اشیا اور منشیات کو تلف اور نذر آتش کردیا ۔پاکستان کسٹمز انفورسمنٹ کلکٹریٹ کراچی کے زیراہتمام بدھ کو ضبط شدہ مضر صحت ممنوعہ اسمگلڈ شدہ/زائد المیعاد اشیا اور منشیات کو تلف اور نذرآتش کرنے کی تقریب گڈاپ ٹاؤن کراچی میں منعقد کی گئی تقریب کے مہمان خصوصی کلکٹر کسٹمز انفورسمنٹ کراچیمعین الدین احمد وانی تھے ۔

تقریب میں ایڈیشنل کلکٹر کسٹمز انفورسمنٹ ہیڈ کوارٹر یاسر کلور، ایڈیشنل کلکٹر کسٹمز انفورسمنٹ سید محمد رضا نقوی ،ڈپٹی کلکٹر انفورسمنٹ ہیڈ کوارٹر رابیل کھوکر،ڈپٹی کلکٹر انفورسمنٹ ہیڈ کوارٹر شہزاد علی، اسسٹنٹ کلکٹر کسٹمز انفورسمنٹ ASO بسمہ جتوئی,اسسٹنٹ کلکٹر کسٹمز انفورسمنٹ یاسر کبیر گجر، پاکستان کسٹمز کے دیگر کلکٹریٹس کے افسران، مختلف محکموں کے سینئر افسران، سندھ رینجرز، سندھ پولیس، حساس اداراوں/ایجینسیز کے نمائندوں، کاروباری شخصیات اور عمائدین شہر نے شرکت کی۔

(جاری ہے)

تقریب کا باقاعدہ آغاز تلاوت قرآن مجید سے کیا گیا۔اسسٹنٹ کلکٹر کسٹمز انفورسمنٹ بسمہ جتوئی نے افتتاحی کلمات میں کلکٹر کسٹمز انفورسمنٹ کراچی معین الدین وانی اور تقریب میں شرکت کرنے والے دیگر معزز مہمانوں کو خوش آمدید کہا اور انفورسمنٹ کلکٹریٹ کی کامیاب کارروائیوں کے بارے میں آگاہ کیا اور اس عزم کا اعادہ کیا کہ مستقبل میں بھی کسٹمز انفورسمنٹ کلکٹریٹ کراچی اسی طرح سے زمینی اور سمندری اسمگلنگ کے تدارک کے لئے بر سر پیکاررہے گا اور معاشرہ کو منشیات سے پاک کرنے اور ملکی صنعت کو اسمگلنگ سے نقصان پہنچانے والے عناصر کی سرکوبی اور ملکی معیشت اور کاروبار کے فروغ اور مستحکم کرنے میں اپنا بھرپور کردار ادا کرتا رہے گا ۔

بعد ازاں کلکٹر کسٹمز انفورسمنٹ کراچی معین الدین احمد وانی نے ضبط کی گئی ایک ارب 15کروڑ روپے مالیت کی ممنوعہ،مضر صحت زائد المیعاد اسمگلڈ اشیا اور منشیات کو تلف/ نذرآتش کرنے کا افتتاح کیا ۔تلف اور نذر آتش کی گئی اشیا میں *3969بوتل غیر ملکی *شراب، 408 کین غیر ملکی بیئر، 2.316کلو گرام چرس، 337 ٹن مضر صحت چھالیہ،26093 کلو گرام انڈین گٹکا، 90509ڈنڈے مختلف برانڈ کے غیر ملکی سگریٹس، 48948 کین ایرانی جوس، 53326 کلوگرام چائنیز نمک*(اجینو موتو)، 62770 کلو گرام خشک دودھ، 26420لٹر خوردنی تیل اور دیگر متفرق اشیا جس میں زائد المیعاد ادویات چاکلیٹس,بسکٹس،کیک اور زائد المیعاد کاسمیٹکس شامل ہیں ۔