پاکستان شعوری انتخاب کا نتیجہ ہے، ہمیں آزادی کی قیمت کو یاد رکھنا ہوگا، ڈاکٹر خالد مقبول صدیقی

تحریکِ پاکستان کی خواتین نے نئی نسل کے لیے قربانیوں کی روشن مثالیں قائم کیں،چیئرمین ایم کیوایم پاکستان خواتین نے قیامِ پاکستان میں تاریخی کردار ادا کیا، نئی نسل کو ان کے نقشِ قدم پر چلنا ہوگا،ایم کیو ایم پاکستان خواتین کو بااختیار بنانے کے مشن پر مستقل بنیادوں پر کام کر رہی ہے، نسرین جلیل/ مریم قریشی

ہفتہ 2 اگست 2025 21:30

کراچی(اُردو پوائنٹ اخبارتازہ ترین - این این آئی۔ 02 اگست2025ء)متحدہ قومی موومنٹ پاکستان کے شعبہ خواتین کے زیر اہتمام جشنِ آزادی کی مناسبت سے گلشن شمیم، فیڈرل بی ایریا میں واقع وومن کنونشن سینٹر میں تحریکِ پاکستان میں خواتین کا کردار کے موضوع پر خواتین کے مابین تقریری مقابلے کا شاندار انعقاد کیا گیا۔چیئرمین ایم کیو ایم پاکستان ڈاکٹر خالد مقبول صدیقی نے پروگرام سے خطاب کرتے ہوئے کہا کہ پاکستان اتفاق کا نہیں، شعوری انتخاب کا نتیجہ ہے۔

ہمارے بزرگوں نے یہ ملک قربانیوں سے حاصل کیا۔ ہمیں آزادی کی قیمت کو یاد رکھ کر اپنی قومی شناخت کو تازہ کرنا ہوگا۔انہوں نے مزید کہا تحریکِ پاکستان کی خواتین نے اپنی ہمت، جذبے اور عزم سے نئی نسل کے لیے روشن مثالیں قائم کیں۔

(جاری ہے)

آج ہماری ذمہ داری ہے کہ ہم ان خواتین کی جدوجہد کو یاد رکھیں اور اس مشن کو آگے بڑھائیں۔سینئر مرکزی رہنما نسرین جلیل نے کہا خواتین نے قیامِ پاکستان کی جدوجہد میں مردوں کے شانہ بشانہ کام کیا۔

بیگم رعنا لیاقت علی، محترمہ فاطمہ جناح جیسی عظیم خواتین نے جس جرات اور قیادت کا مظاہرہ کیا، وہ آج کی خواتین کے لیے مشعلِ راہ ہے۔انچارج شعبہ خواتین مریم قریشی نے اپنے خطاب میں کہا ایم کیو ایم پاکستان خواتین کو سیاسی، فکری اور سماجی میدان میں بااختیار بنانے کے لیے عملی اقدامات کر رہی ہے۔ ہم اپنی بچیوں کو صرف تقریری مقابلوں تک محدود نہیں رکھتے، بلکہ انہیں قیادت کے لیے تیار کرتے ہیں۔

پروگرام میں حق پرست اراکین اسمبلی ایم کیوایم پاکستان، مختلف ٹانز کی طالبات نے پرجوش انداز میں شرکت کی اور موضوع پر بھرپور تقاریر کیں۔ نظامت کے فرائض محترمہ امبر انیس نے انجام دیے۔سابق انچارج شعبہ خواتین سکندر باجی، خواتین ونگ کی ذمے داران، سیاسی کارکنان، نوجوان طالبات اور شہری خواتین کی بڑی تعداد تقریب میں شریک ہوئی۔اختتام پر نمایاں کارکردگی کا مظاہرہ کرنے والی شرکا کو اسناد و انعامات سے نوازا گیا اور ملکی سلامتی، استحکام اور شہدا کے لیے خصوصی دعا کی گئی۔