چیئرمین پیپلز پارٹی

بلاول بھٹو کا جانوں کا نذرانہ پیش کرنے والے پولیس شہداء کو خراج عقیدت

اتوار 3 اگست 2025 21:10

اسلام آباد (اُردو پوائنٹ اخبارتازہ ترین - اے پی پی۔ 03 اگست2025ء) پاکستان پیپلز پارٹی کے چیئرمین بلاول بھٹو زرداری نے یومِ شہداءِ پولیس کے موقع پر اپنے فرائض کی ادائیگی کے دوران جانوں کا نذرانہ پیش کرنے والے پولیس فورسز کے بہادر بیٹوں اور بیٹیوں کو خراج عقیدت پیش کیا ہے۔ اتوار کو میڈیا سیل بلاول ہاؤس سے جاری بیان کے مطابق پی پی پی چیئرمین نےیومِ شہداءِ پولیس کے موقع پر اپنے پیغام میں کہا کہ پولیس کا ہر شہید بہادری کی علامت اور اس بھاری قیمت کی یاد دہانی ہے جو قیامِ امن کے لیے ادا کرتے ہیں۔

انہوں نے مزید کہا کہ ہمارے پولیس کے شہداء امن کے خاموش نگہبان ہیں، جنہوں نے اس لیے اپنی جانیں قربان کیں تاکہ ہمارے عوام بلاخوف زندگی گزار سکیں۔ انہوں نے تمام صوبوں کی پولیس کی خدمات اور قربانیوں کو سراہتے ہوئے کہا کہ دہشتگردی کے خلاف جنگ ہو یا اسٹریٹ کرائم سے نمٹنا، پاکستان کی پولیس فورس نے اپنی ذمہ داریاں اکثر اپنی جانیں داؤ پر لگا کر بھی نبھائی ہیں۔

(جاری ہے)

چیئرمین بلاول بھٹو زرداری نے پولیس شہداء کے اہل خانہ کی فلاح و بہبود سے متعلق پاکستان پیپلز پارٹی کے پختہ عزم کا اعادہ کیا اور اس بات پر زور دیا کہ ان کی قربانیوں کو باقاعدہ طور پر تسلیم کرتے ہوئے ادارہ جاتی سطح پر ان کی پذیرائی اور مدد کو یقینی بنایا جائے گا۔ انہوں نے قوم سے مخاطب ہوتے ہوئے کہا کہ آئیے ہم ان کی یاد اور احترام میں سر جھکاتے ہوئے یہ عہد کریں کہ ہم ایک ایسا معاشرہ تعمیر کریں گے جو ان کی قربانیوں کے شایانِ شان ہو، ایک ایسا معاشرہ جو انصاف، امن اور وقار کی پاسداری کے اصولوں پر قائم ہو۔