5 اگست 2019کشمیر کی آزادی کی جد وجہد میں سیاہ ترین دن ہے، مشعال ملک

منگل 5 اگست 2025 22:40

کراچی (اُردو پوائنٹ اخبارتازہ ترین - اے پی پی۔ 05 اگست2025ء) حریت رہنما یاسین ملک کی اہلیہ مشعال ملک نے کہا ہے کہ کشمیر کی تحریک آزادی میں 5 اگست 2019 سیاہ ترین دن ہے۔انہوں نے یہ بات منگل کو یہاں مزار قائد پر حاضری کے موقع پر میڈیا سے گفتگو کرتے ہوئے کی۔ مشعال ملک نے کہا کہ مزار قائد پر آ کر انہیں روح اورطاقت ملتی ہے، قائد اعظم نے زندگی کا ہر لمحہ پاکستان کی آزادی کیلئے وقف کیا، قائداعظم نے کشمیر کو پاکستان کی شہ رگ کہا تھا۔

(جاری ہے)

حریت رہنماء کی اہلیہ نے کہا کہ کشمیر کی تحریک آزادی میں 5 اگست سیاہ ترین دن ہے، آج کشمیریوں کو معلوم ہے کہ آزادی کی قیمت کیا ہوتی ہے۔مشعال ملک نے کہا کہ بھارت پاکستان میں دہشت گردی کی کارروائیوں میں مصروف ہے، پاکستان میں "را" کا نیٹ ورک پھیلا ہوا ہے، بھارت نے پہلگام فالس فلیگ آپریشن کا الزام پاکستان پر لگایا اور جنگ چھیڑی،بھارت نے جنگ میں بھی شہری آبادی کو نشانہ بنایا، اللہ نے "معرکہ حق" میں پاکستان کو فتح عطا فرمائی۔ دریں اثنا مشعاللک نے اپنی بیٹی کے ہمراہ مزار قائد پر حاضری دی اور مزار پر پھول رکھے اور فاتحہ خوانی کی۔ بعد ازاں انہوں نے مزار کے احاطہ میں قرآن کی تلاوت بھی کی۔