عمران خان کے بیٹوں کو پاکستان آنے سے حکومت نہیں روک سکتی، علیمہ خان

راولپنڈی(اُردو پوائنٹ اخبارتازہ ترین - این این آئی۔ 08 اگست2025ء)بانی پی ٹی آئی کی بہن علیمہ خان نے کہا ہے کہ عمران خان کے بیٹوں کو پاکستان آنے سے حکومت روک نہیں سکتی،کب تک جج مجبوری میں ہمیں انصاف نہیں دیں گے ،14 اگست کو بھی سیاسی قوت مظاہرہ ہوگا۔عدالت میں پیشی کے موقع پر میڈیا سے گفتگو کرتے ہوئے علیمہ خان نے کہا کہ ہمارے خلاف کئی کیسز ہیں ،یہاں ہماری ضمانت نہیں ہوگی،قتل کیس میں میرے وارنٹ گرفتاری نکالے گئے ہیں، جب گرفتاری کرنا ہوگی یہ کر لیں گے، یہ سب ناجائز کیسز ہیں، میرا جرم یہ ہے میں عمران خان کا میسج عوام میں لاتی ہوں ، کیا عمران خان کا پیغام باہر لانا جرم ہی ۔

انہوں نے کہا کہ جج سے بھی کہیں گے کہ آپ کی مجبوری ہے، مجبوری میں کب تک ایسا کریں گی ،کب تک جج مجبوری میں ہمیں انصاف نہیں دیں گے ، پولیس والے کہتے ہیں ہم پر دباؤ ہے، غلط کیسز باہر پھینکیں، آپ ہیرو بنیں گے، قوم آپ کے ساتھ ہوگی،ہم کبھی پنڈی کبھی لاہور کیسوں میں جا رہے ہیں،جرم نہیں تو ہمیں انصاف دیں، جرم ہے تو سزا دے دیں۔

(جاری ہے)

علیمہ خان نے کہا کہ غریب آٹھ نو گھنٹے سفر کر کے آتے ہیں، ان کی مدد بھی کرتے ہیں، ایک دفعہ سب کو بلا کر جرم ہے تو ثابت کرا دیں یا انہیں چھوڑ دیں،پاکستان میں جوڈیشل سسٹم پر اعتماد ختم ہوگیا ہے، ججز اسے بحال کریں۔

بانی چیئرمین کی بہن نے کہاکہ 14 اگست کو بھی سیاسی قوت مظاہرہ ہوگا،14 اگست آزادی کیلئے مسلمانوں نے قربانیاں دی تھیں، ایک دن میں آزادی نہیں ملی،25 لاکھ افراد نے آزادی کیلئے قربانی دی تھی،عمران خان اپنی آزادی نہیں، قوم کی آزادی چاہتے ہیں،14 اگست عوام کو آزادی نہیں ملی، اشرافیہ نے دھوکا دیا۔عمران خان کے بیٹوں سے متعلق بات کرتے ہوئے انہوں نے کہا کہ قاسم اور سلیمان کے پاس نائیکوپ ہے کارڈ نہیں ہے، برٹش پاسپورٹ پر دونوں نے ویزا کیلئے اپلائی کر دیا ہے، سلیمان اور قاسم کو پاکستان آنے سے حکومت نہیں روک سکتی۔

انہوں نے کہا کہ ویزا کیلئے ایک بارپھر ہم ایمبیسی سے رابطہ کریں گے، ویزا نہیں دیں گے تو سلمان اور قاسم مزید کوشش کر لیں گے، کارڈ کیلئے اپلائی کیا تو حکومت 6 ماہ لگا دے گی، طلال چوہدری سے بھی ویزا کیلئے رابطہ کر لیں گے،وزارت داخلہ نے کہا یہ ہمارا نہیں وزارت خارجہ کا کام ہے۔انہوں نے کہا کہ پاکستان میں قوم نے 5 اگست کو خوف کے بت توڑ دیے ہیں،اڈیالہ جیل کے باہر بیٹھتے ہیں تو قانون نہیں توڑتے گھنٹوں بیٹھتے ہیں، ملاقات نہیں کرائی جاتی،قتل کیس میں عبوری ضمانت نہیں کراؤں گی۔